Fa’atupe ‘e le Mālō fōma’i sinia fou ‘e 50, fa’apea fo’i tausi soifua

‘O lo’o fa’atupeina ‘e le Mālō ni fōma’i sīnia ‘se to’a 50, fa’apea ma nisi tausi soifua, ‘e tali ai ‘i le to’agaogao ‘o ‘aufaigāluega ‘i nu’u ‘i tua, ‘o ‘au’aunaga ‘o le soifua mālōlōina ‘o le māfaufau, ‘au’aunaga mō tinā failelele ma ‘au’aunaga tā’ua mō isi gasegase ‘e ‘iai mana’oga fa’apitoa.  ‘O le fua fa’atatau ‘a le Soifua Mālōlōina ‘a Niu Sila, pe  tusa ma le 20 miliona tālā le tau ‘e fa’atupe ai fōma’i ‘e fa’atinoina le gāluega fesāga’i ma tagata, ‘e fua ‘i luga o ō lātou agava’a ma tomai.  10 miliona tālā ‘o le ‘ā fa’aagaga mō tausi soifua fou. 

Sā saunoa le Minisitā ‘o le Soifua Mālōlōina, Dr Shane Reti, ‘o le ‘ā fa’aitīitia ai taimi fa’atalitali, fa’aleleia ai le saogalēmū ‘o gasegase ma lagolago ai ‘i isi ‘au’aunaga fa’apitoa ‘e pei ‘o le dermatology lea ‘o lo’o matuā mo’omiaina lava nisi ‘aufaigāluega.  Na saunoa le minisitā, ‘e telē lava le suiga lelei lea ‘ua maua ai isi tausi soifua ‘i le 12 māsina ‘ua tuana’i, peita’i ‘e le’o lava lava le ‘aufaigāluega.  ‘E iai se isi 12 miliona tālā ‘ua fa’atūlagaina ‘e totogi ai nisi vāega lāiti, ‘e pei ‘o gāluega toe fa’aleleia, sui ai nisi ‘o masini ma fa’atau ai nisi tusi fou ma ni meata’alo mō tamaiti ‘o lo’o faia o lātou togafitiga.  ‘O le ‘ā tu’u atu lava ‘i itūmālō le fa’aaluga ‘o a lātou tupe pei ‘ona saunoa le minisitā.  Sa iai fa’atasi Dr Reti ma le Komesina ‘o le Soifua Mālōlōina ‘a Niu Sila ‘o Lester Levy, lea na filifilia ‘i le māsina ‘o Iulai, ‘e fofō le fa’afitāuli ‘e fa’apea ‘ua 1.4 piliona tālā le tupe ‘ua ‘ova ‘ona fa’aaluina mai le pāketi fuafuaina.

Link to RNZ (Article) translated by Savelina Kasiano: https://www.rnz.co.nz/news/political/534828/government-to-fund-50-more-senior-doctors-more-nurses

ATA: Health Minister Shane Reti says the investment will reduce wait times, improve patient safety and support vulnerable specialities Photo: RNZ/Nick Monro