Fa’atūlaga ‘e le Mālō le $30 Miliona mō le Ātina’e ‘o Tūrisi ma le Puipuia ‘o Fa’ama’i ‘e a’afia ai Fa’ato’aga

‘E $30 Miliona talā se vāegatupe ‘ua fa’atūlaga ‘e le Mālō Niu Sila, mō le fa’aleleia ‘o vāega ‘e mana’omia mō le ātina’e ‘o tūrisi fa’apea ai ma ni ātina’e ‘e puipuia ai le si’osi’omaga ma le a’afia ‘o fa’ato’aga ‘i ni fa’ama’i.

‘O le Minisita ‘o le Puipuiga ‘o le Si’osi’omaga, ‘o Tama Potaka ma le ali’i Pālemia ‘iā Christopher Luxon, na o lā’ua fa’ailoaina mai lea fuafuaga, ‘i le mā’ea ai ‘o le fonotaga māsani ‘a le kapeneta ‘i le aso ‘ananafi.

‘E aofia ‘i lenei vāegatupe le $11 Miliona talā mō le fa’aleleia ‘o nofoāga ‘e fiafia tūrisi ma tagata tāfafao mai fafo ‘e asiasi iai, ma le isi $19 Miliona talā, mō galuega ‘auā le puipuia ‘o le si’osi’omaga ma ni fa’ama’i ‘e ono a’afia ai fa’ato’aga.

‘O galuega ‘o le ‘a fa’atino ‘i le $11 Miliona mō le ātina’e ‘o tūrisi, ‘e aofia ai le fa’aleleia ‘o paka ta’avale ‘ātoa ma fale ‘i nofoaga ‘e āga’i iai tafaoga ma maimōaga ‘a tūrisi, ‘i le mauga ‘o Aoraki Mt Cook, fa’apea motu lāiti ‘o Rangitoto ma Motutapu.

‘E lē gata ‘i lea, ‘o le ‘a fa’aleleia ai fo’i ni ‘auala savali ‘aemaise ala laupapa, ‘e lē gata ‘i lea ‘o le ‘a fa’aleleia ai fo’i matāfaga ‘i le motu ‘o le Goat Island. ‘Ae ‘o le $19 Miliona talā ‘ua fa’aagaga mō galuega ‘i le puipuia ‘o le si’osi’omaga, ‘o le ‘a fa’aaogā ‘i polokalame ‘e taofiofia ai le fa’atupula’ia ‘o meaola ‘e iai le Wallabies fa’apea ia ‘oti ma tia ‘i ‘ele’ele fa’asaoina po’o National Parks. ‘E lē gata ‘i lea ‘ae ‘o le puipuia ‘o lā’au ‘i fanua ma ‘ele’ele fa’asaoina.

Na fa’aalia mai ‘e le ali’i Minisita ‘iā Tama Potaka, ‘o lenei seleni ‘e $30 Miliona talā na maua mai ‘i le lāfoga mō tūrisi lea sā $35 talā ‘a le tūrisi ‘e to’atasi, ‘a’o lea ‘ua si’i ile $100 talā ‘e le faigāmālō so’ofa’atasi ‘o lo’o tū nei ‘i le foe.

Link to RNZ (Article) translated: https://www.rnz.co.nz/news/political/542146/government-announces-30m-spend-on-tourism-infrastructure-and-biodiversity-projects

ATA: RNZ / Marika Khabazi