Fa’atonuina le Faletupe ‘e toe totogi le $30,000 ‘i se faiga taufa’asesē

‘O le ‘ā toe fa’atumu ‘e se faletupe le tupe ‘a se tama’ita’i na fa’asesēina ‘e se tagata na vili na fa’afōliga ‘o ia ‘o se tagata faigāluega.  Na su’esu’eina ‘e le ‘Ōfisa ‘o sulufa’iga ‘i matā’upu ‘i faletupe, le matā’upu ‘a lea tama’ita’i ‘i le māsina ‘o Tēsema ‘i le tausaga talu ai.

‘O le tala ‘a lea taule’ale’a ‘i le tama’ita’i, ‘o le ‘ā tāpuni mō se taimi lē tūmau lana teugātupe ma ‘ave’ese ana tupe ‘ua ‘uma ‘ona fa’atūlaga ‘e totogi ai ana ‘aitalāfu, mā ‘o le ‘ā tu’u atu fo’i ‘i ai ni nūmera ‘e mafai ai ‘ona fa’atino ‘e le tinā lea gāioiga. 

Na siaki ‘e le tinā ‘i luga ‘o le ‘upegatafā’ilagi le nūmera ‘o le telefoni na vala’au atu ai le tagata ma iloa ai, sā tutusa lelei.  ‘O le ala lea na ia usita’ia ai fa’atonuga na fa’ao’o atu, ma lona lē iloa ‘o se tagata taufa’asesē.  ‘Ae na māsalosalo ‘ina ‘ua fai atu le tagata na vili atu, ‘e mo’omia le ‘ave ‘o lana tupe ‘i se isi teugātupe ‘e sefe ai.  Mulimuli ane na telefoni le tama’ita’i ‘i le faletupe ma iloa ai ‘o se faiga taufa’asesē.  ‘Ua ‘uma ‘ona ‘ave’ese ‘e le taule’ale’a le $30,000 mai lana credit card ‘ae na toe taumafai ‘e ‘ave’ese fo’i se isi vaegātupe telē peita’i na poloka ai loa ‘e le faletupe.

‘Ua fa’atonuina ai le faletupe ‘e toe totogi le $30,000 ‘a le tinā fa’aopoopo ‘i ai le $1000 ‘ona ‘o le fa’atuai ‘o le fa’atautaiga ‘o lana matā’upu.

Link to RNZ (Article) translated by Savelina Kasiano: https://www.rnz.co.nz/news/business/538725/bank-told-to-reimburse-30-000-after-scammer-impersonates-staff

ATA: Sāmoa Capital Radio (file).