Fa’ato’ese Tiaki Wai ‘ona ‘o le pili mō se ‘āiga ‘e le’o mafai ‘ona fa’aaogā le suāvai

Na fa’ato’ese le fa’alāpotopotoga ‘o lo’o va’aia le suāvai, le Tiaki Wai, ‘i le Aso Lulu, ‘i ‘āiga na ‘ave ‘i ai ni pili mō le suāvai ‘ae le’o mafai ‘ona fa’aaogā o lātou fale, ‘ona na fa’aleagaia mai ni afā.  Na fa’aalia ‘e le Tiaki Wai, ‘o se sasi ‘a le fa’alāpotopotoga.

‘O le lua vāiaso talu ai, na ‘āmata lafo ai ‘e le Tiaki Wai, pili muamua mō le suāvai ‘i ‘āiga ‘i le ‘itūmālō ‘o Uēligitone.  Na tu’ua ‘e Aaron Pahl ma lona ‘āiga lo lātou fale ‘i Stokes Valley ‘i le māsina ‘o Fepuari, ‘ina ‘ua ‘āmata ‘ona solo ‘i lalo le fa’avae ‘o le fale talu ai le mālolosi ‘o matagi ma le fa’alētonu ‘o le tau.  Na fa’ailoa atu ‘e le pūlēgānu’u, ‘e lē mafai ‘ona toe fo’i ‘i lo lātou fale.

‘O lo’o iai fo’i le fa’asilasilaga ‘i le faitoto’a, ‘ā fai ‘e toe nonofo ai, ‘o le ‘ā fa’asala ‘i lātou ‘i le $200,000.  ‘E tele ni tau ‘o feagai ma ia ‘e toe fa’alelei ai lona fale, ‘ae ‘ua toe fa’aopoopo atu ma lea tīgā telē, ‘i le pili ‘o le suāvai ‘e $562 ‘e tatau ‘ona totogi ‘i le aso 1 Sētema.

Na tu’uina ‘i ai ‘e le Pūlēgānu’u ‘a le Hutt le avanoa ‘e fa’amisi pe lē totōgia ai ana lāfoga po’o rates ma sā ia fa’aalia, ‘e tatau fo’i ‘ona fai fa’apea ‘i lana pili ‘o le suāvai. 

Na fa’aalia fo’i ‘e Josh Palmer ‘i le Leitiō Niu Sila, ‘o lo lātou fale ‘i Berhampore, ‘ua lē mafai ‘ona toe nofoia pei ‘ona a’afia ‘i lōloga ‘i le māsina ‘o ‘Aperila, ma na tu’uina atu fo’i le fa’atagaga mai le Pūlēgānu’u ‘a Uēligitone ‘e fa’amisi pe lē totōgia ai ni rates.  Peita’i, ‘e le’i fa’ate’ia ‘i lā’ua ‘i le maua ‘o la lā pili ‘o le suāvai ‘e $500.  ‘Ae na talosaga ‘e pei fo’i ‘ona faia ‘i lāfoga po’o rates, ‘ina ‘ia ‘aua ne’i totōgia ‘ona ‘ua lē mafai ‘ona toe nonofo ‘i lo lātou fale.  Na fa’ate’ia ai ‘i lā’ua ‘ina ‘ua tē’ena la lātou talosaga ‘e le kamupanī suāvai. 

Na tā’ua ‘e Palmer, ‘ua toe ‘apili ‘e lona ‘āiga lea fa’ai’uga ma le fa’amoemoega, ‘e taga’i le Tiaki Wai ‘i lea tūlaga. 

Na fa’ato’ese le pule sili ‘o le Tiaki Wai, Michael Brewster ‘e fa’atatau ‘i ni pili ‘ua sesē ‘ona lafo ‘i tagata ‘e lē tatau ‘ona mauaina ni pili, ‘ona ‘o lo’o tau fa’amāsani le ‘aufaigāluega ‘i le fa’atinoga ‘o gāluega ‘o le ‘au’aunaga fou. ‘Ae ‘o ‘āiga ia na maua le fa’amāmā ‘avega ‘i rates ‘ona ‘o fale na fa’aleagaina ‘i afā, ‘ā lē fa’apa’ū a lātou pili, po’o le lēai fo’i ‘o se tau ‘e totogiina pei ‘ona saunoa Brewster.

Link to RNZ (Article): https://www.rnz.co.nz/news/regions_wellington/901241/tiaki-wai-apologises-after-wellington-residents-fight-bills-for-water-they-can-t-use

IMAGE/ATA: Supplied / RNZ.