Fa’ato’ese le Palemia ‘i le ‘au faipisinisi

‘Ua fa’ato’ese le ali’i palemia, ‘ona ‘o ni lafoga sa ia faia ‘i le ‘au faipisinisi ‘i le ‘a’ai ‘o Rotorua ‘i le vaiaso talu ai.

Na ia fa’aālia ‘e fa’apea, “na pa’u ia te ia ‘ona ia ta’ua le tele ‘o fa’afītauli ‘o lo’o feagai ma le ‘au faipisinisi lāiti ‘o le atunu’u.”

‘O le Aso Gafua ‘ananafi, lea na fa’aālia ai ‘e Tuisinavemaulumoto’otua Christopher Luxon, ‘ua ia mautinoa, ‘e tele pisinisi lāiti ‘o lo’o feagai ma fa’afītauli ‘i le taimi nei, ma ia fa’amauālalo ai tusa ‘o ana saunoaga ‘i le vaiaso ‘ua mavae.

Sa tā’ua ai fo’i ‘e le ali’i palemia, ‘ua ‘uma ‘ona ia talanoa ‘i le Minisita ‘o le Vā ‘i Fafo, ia Vaovasamānaia Winston Peters, ‘e tusa ‘o ana ia fo’i saunoaga fa’ailogalanu ma fa’ailoga tagata ‘i le vaiaso ‘ua mavae.

‘O le fono ‘a le ‘aufai’oloa ‘o Rotorua ‘i le vaiaso talu ai, sa fa’aālia ai ‘e le Fa’atonu ‘o lea fa’alāpotopotoga, ‘o Melanie Short ‘i le palemia, ‘e iai le ‘au faipisinisi sa ō latou fesiligia pe ‘o le ā le ‘umi ‘o le ‘a feagai ai pea ‘i latou ma le mauāluga ‘o le tau ‘o le fa’afoeina ‘o pisinisi.

‘O le tali ane iai ‘a le ali’i palemia, na ia tā’ua ai, ‘o nisi pisinisi ‘e manatu ‘o le Mālō ‘o sō latou matua, e saga fa’alagolago pea iai. Peita’i la, na tā’ua ‘e Luxon ‘i le Aso Gafua, na sasi ‘o ia ‘i lea lafoga ma sā lē tatau ‘ona ia lē faia lea fa’a’upuga.

Link to RNZ (Article): https://www.rnz.co.nz/news/politics/874803/watch-pm-christopher-luxon-apologises-for-parent-child-mentality-comments

IMAGE/ATA: RNZ/Screengrab