Fa’ato’ese aloā’ia le Mālō Niu Sila

“’Ua mātou fa’alogo ‘i lō ‘outou si’ufofoga ma ‘ua mātou talitonu.”  ‘O nisi ‘o ‘upu na saunoa ai le Palemia Christopher Luxon ‘i le fa’ato’esega āloa’ia ‘a le Mālō ‘o Niu Sila, ‘i tagata na potopoto ‘i le Palemene ma ē na maimoa atu mai vāega ‘ese’ese ‘o le atunu’u, ‘o ē na sauāina ‘a’o ‘i lalo ‘o le va’aiga ma le tausiga ‘a le Mālō ‘o Niu Sila ‘i tausaga ‘ua mavae, ‘ina ‘ua māe’a ai se gāluega tele ‘a le Komisi su’esu’e ‘a le Mālō ma fa’atalanoaina ai ē na sauāina. Na fai ai ‘o ia ma sui ‘o le faigāmālō ‘a Niu Sila, ‘o faigāmālō ‘ua tuana’i atu ‘e momoli ma fa’aleo le fa’ato’esega.

Sā fa’ato’ese Luxon, ‘ona sā fa’ataliga tuli le mālō ma lē talitonu ‘ina ‘ua fa’aleo a lātou fa’aseā ‘e fa’atatau ‘i sauaga na o’o ‘iā ‘i lātou.  Sa fa’ato’ese ‘ona ‘e to’atele na fa’ataliga tuli ma lē ano ‘e tāofi pe lipoti sauaga, ‘ona ‘o le fa’alētonu ‘o le va’aiga ‘a le mālō ‘i ē na tu’u atu ‘i ai na te tausiaina.  Sa fa’ato’ese fo’i le Palemia ‘ona ‘o le to’atele ‘o ē na faia sauaga, sā le’i fa’asaga ‘e tali ‘i le tūlāfono, sā tuai le gāioiga ‘a le mālō ‘e puipui ‘i tagata ‘uma na i nofoaga na tausia ai.

Na saunoa Luxon, ‘e onomea ma tatau le ō fa’atasi ‘o ‘upu ma fa’atinoga.  ‘E tatau ‘ona faia le mea sa’o ma tu’uina atu le fesoasoani ‘o lo’o lātou mo’omiaina.  Ma lona lua, ‘e tatau ‘ona faia ‘e le Mālō so’o se gāioiga ‘e tāofia ai le toe tupu ‘o lenei fa’alētonu ‘i le lumana’i.  Na saunoa le palemia, ‘e to’atele ‘i lātou na fa’asaoina mai sauaga, ‘e le’i mānana’o ‘e ‘āuai ‘i le fa’agāsologa ‘o lo’o faia ‘e maua ai o lātou taui, peita’i, ‘e silia ma le 3500 ‘i lātou na ‘āuai, ma sā ia fa’ailo ai se isi 32 miliona tālā fa’aopoopo ‘e tu’u ‘i totonu ‘o le polokalame ‘a’o gālulue ai ‘i le fa’agāsologa fou ‘o le faiga ‘o taui.  Sā saunoa le ta’ita’i ‘o le Itū Agai, Chris Hipkins, ‘e fa’ailoa āloa’ia le ‘āuai fa’atasi ma le mālō ‘i lana fa’ato’esega, ma ‘o se aso tāua tele.  ‘E telē se ‘aitālafu ‘a le atunu’u ‘i tagata na fa’asaoina mai sauaga pei ‘ona saunoa Hipkins.

Link to RNZ (Article) translated by Savelina Kasiano: https://www.rnz.co.nz/news/political/533553/you-deserved-so-much-better-christopher-luxon-apologises-to-survivors-of-abuse-in-care

ATA: RNZ.