Fa’ato’afīlēmū ‘e le Navy atugaluga ‘i ni suāu’u ‘o masa’a mai le HMNZS Manawanui

‘E 30 mita le loloto ‘o le sami ‘o lo’o ta’oto ai nei le va’a ‘a le Navy ‘a Niu Sila, le HMNZS Manawanui, lea na goto ‘i talafātai ‘i saute ‘o ‘Upolu, mā ‘e le’o iai se suāu’u ‘o liki pe masa’a, ‘e tusa ai ma se fa’aaliga ‘a Commodore Shane Arndell ‘i le polokalame ‘o le Checkpoint ‘a le Leitiō Niu Sila ‘i le Aso Lua. 

‘O le taeao ananafi na faia ai se gāluega ‘a le ‘au māulu ‘e iloilo le va’a, ma ‘e tusa ai ma la lātou līpoti, ‘e lēai se suāu’u ‘o liki mai le va’a talu ‘ona goto, ‘e o’o mai ananafi.  ‘O lo’o māgoto le va’a ‘i se vāega ‘o le ā’au pei ‘ona fa’aalia e Arndell ma ‘o lo’o ‘i se tūlaga maopoopo lelei le va’a.  ‘O le tūlaga mautinoa, ‘o lo’o fa’aleagaina peita’i ‘e le’o mafai ‘ona au’ili’ili lea tūlaga ‘i le taimi nei.  Sa iai molimau mai tagata ‘o Sāmoa ‘e fa’apea ‘ua iai se suāu’u ‘ua va’aia ‘i gātaifale.  Sa fesiligia le sui ‘o le Navy pe fa’apēfea lipoti mai tagata Sāmoa ‘e fa’apea ‘ua va’aia ni laumei ‘ua lilofia tino ‘i le suāu’u pe ‘ā fai ‘e le’o liki le Manawanui, ‘ae na ia saunoa, ‘e tele se suavai (liquid) na liki mai le va’a ‘i le taimi na goto ai, peita’i ‘o lea ‘ua māe’a ‘ona tāofia. 

Muamua atu na faia ai se fa’aaliga ‘a le mālō ‘o Sāmoa ‘i le Aso Lua, ‘e lēai se vāega ‘o liki mai le va’a.  ‘E lata ‘i le 1000 tone ‘o le suāu’u ‘o le tiso na i luga ‘o le Manawanui ‘ina ‘ua goto pei ‘ona fa’aalia ‘e Garin Golding ‘o le Navy ‘a Niu Sila.  ‘O le asō lea ‘e malaga ai le va’a ‘o le Canterbury mō Sāmoa, ‘o lo’o ‘aveina ai se masini po’o ni vāega fa’apitoa ‘e ao ai le suāu’u pe ‘ā masa’a.

Link to RNZ (Article) translated by Savelina Kasiano: https://www.rnz.co.nz/news/top/530173/navy-dispels-concerns-hmnzs-manawanui-is-leaking-oil

ATA: The Manawanui sank off the south coast of the island of Upolu on Saturday. Profile Boats / supplied. (RNZ).