Fa’ate’ia se tinā ‘i lana pili ‘i le IRD ‘e $9000

Na tutulu le tinā ‘iā Megan Hunt ‘ina ‘ua fa’ate’ia ‘o ia, ‘i lana pili ‘e $9000 ‘e totogi ‘i le ‘Ōfisa ‘o Lāfoga, ‘ona ‘e fa’apea ‘o tupe na ‘ova ‘ona totogi atu ‘iā te ia ‘i lalo ‘o le polokalame ‘o le Working for Families, po’o tupe mō ‘āiga ‘e iai tamaiti ‘i lalo ‘o le ta’i 18 tausaga le matutua. 

Na māfua ‘ona lē iloa lea fa’alētonu, ‘ona sā malamalama sesē ‘i se pepa fa’atumu ‘e resitala ai lana tamaitiiti muamua.  Lona uiga, sā le’i iloa ‘e le ‘ōfisa, ‘e iai lana pā’aga, ma sā sesē le fa’atumuga ‘o ia ‘o se tinā ‘e lēai se to’alua.

‘O tusi ‘uma na ia mauaina mai le Working for Families sa le’i iai se fa’ailo ‘o lo’o iai ni fa’amatalaga ‘o lo’o misi ‘iā te ia, ‘e o’o lava ‘i le resitalaga ‘o lana tamaitiiti lona lua.  Na tā’ua ‘e le tinā, na tagi ‘ina ‘ua fa’ailoa atu ‘i le ‘ōgātotonu ‘o Nōvema, ‘e iai lana ‘aitālafu ‘e $9000, ‘ae ‘e fa’agata ‘i le aso 2 Tēsema le totogiga ‘o le ‘aitālafu ‘o le tausaga muamua.  ‘Ua māe’a ‘ona fa’atūlaga le togitogiga ‘o lana ‘aitālafu.  ‘O lana fa’amatalaga, ‘e tatau ‘ona suia le fa’agāsologa ‘o le polokalame, ‘ina ‘ia fa’amanino lelei ‘i mātua fou, po’o ā tonu fa’amatalaga ia ‘ua lafo atu ‘iā ‘i lātou. 

Na talosaga le tinā mō fa’amaumauga āloa’ia ‘e ala atu ‘i le Official Information Act, lea na fa’ailoa ai, ‘o le tausaga fa’alelāfoga 2023/24, ‘e 77,150 tagata na ‘ova ‘ona totogi atu ‘i ai tupe mō le Working for Families, ‘e tusa lea ma le $144 miliona.  Sā tele lava ‘ina ‘i luga atu ‘o le ta’i 87,000 pe latalata atu lava ‘i le 100,000, le aofa’iga ‘o tagata na ‘ova ‘ona totogi atu ‘i ai tupe ‘a tamaiti, ‘i totonu ‘o tausaga ta’itasi ‘e 4 ia na muamua atu.

Na fa’aalia ‘e le ‘Ōfisa ‘o Tupe Maua po’o le ‘Ōfisa ‘o Lāfoga, ‘o ‘aitālafu ‘i le Working for Families, sā $263.668 miliona ‘i le māsina ‘o Nōvema.  ‘Ua pa’ū mai le $280 miliona ‘i le māsina ‘o Mē peita’i na matuā maualuga atu nai lō le $162 miliona ‘i le māsina ‘o Iūlai 2020.

Link to RNZ (Article) translated by Savelina Kasiano: https://www.rnz.co.nz/news/national/538333/new-mother-s-surprise-9000-tax-bill

 ATA: RNZ