Fa’ataunu’u le koneferenisi fa’aletausaga ‘a le Whanau Manaaki

‘E lua aso na faia ai le koneferenisi fa’aletausaga ‘a le ‘au’aunaga ‘a le Whanau Manaaki, na fa’amāe’aina ‘i le aso ananafi. ‘O le ‘auga ‘o lea koneferenisi, ‘ina ‘ia ōmai fa’atasi ai faiā’oga ‘uma ‘o ā’oga fa’ata’ita’i ‘a le Whanau Manaaki, fa’apea le ‘aufaigāluega, ‘e fa’alogologo ‘i fa’asoa ‘a le ‘au fai tōfā ‘i matā’upu fa’atatau ‘i alo ma fānau lāiti, ‘e le gata ‘i lea, ‘e fa’asoa ‘i fa’afītāuli ‘e feagai ma tamaiti lāiti ‘i le taimi nei.

Sa ‘āuai sui ‘o le pālemene iā Nanaia Mahuta, Jan Tinetti fa’apea le faipule ‘o Mana iā Barbara Edmonds. Sā ‘āuai fo’i le pulenu’u ‘o Porirua Anita Baker ma le faitau afe ‘o tagata faigāluega ‘i lalo ‘o le fa’alāpotopotoga. Sā maua le avanoa ‘e fa’asoa ai sē tasi ‘o alo ‘o Sāmoa ‘e faiā’oga ‘i le Iunivesetē ‘o Vītoria, Dr Fuapepe Rimoni. Na fa’amamafa lana fa’asoa ‘i le tāua ‘o gāluega ‘a faiā’oga,’e lē gata mō tamaiti lautele ‘ae sā fa’amamafa lana talanoa ‘i tamaiti pasefika. Sa faia ana su’esu’ega ‘e fa’atatau ‘i le tāua ‘o le sao ‘o faiā’oga pasefika ‘i ā’oga fa’ata’ita’i, ma lagona ‘o le tamaititi pasefika pe ‘ā alu atu ‘i le ā’oga ‘o iai se faiā’oga pasefika.

Saunoa Fuapepe, ‘o tamaiti Sāmoa ‘e ese le fa’atāua ‘o ō lātou ‘āiga ma so’otaga. Na saunoa Donna Eden ma Caroline Mc Glinchy mai le Incredible Familys Trust, ‘e fa’apea, ‘o le māfaufau ‘o le tamaititi ‘e mafai ‘ona matua’i a’afia ‘i sāuaga pe ‘ā fa’apea ‘e sauaina ‘i totonu ‘o ‘āiga, ‘ae ‘e mafai ‘ona toe suia uma nā mafatiaga ‘i le alofa – Brains are wired for connection, but trauma rewired them, so is LOVE. Na tāualuga le fa’amoemoe ‘i sē tasi fo’i alo ‘o Sāmoa, le Susuga Tau’ili’ili Tofiga Fepulea’i, sā fa’asoa ‘i lona ōlaga tuputupu a’e, ‘ae fa’amamafa lava ‘i le fa’atāuaina ‘o le ‘ata. ‘O le ‘ata, ‘o le vailā’au sili lea mō tagata ‘uma, pei ‘ona saunoa Tofiga. Sā patipatia fo’i taumafaiga ‘a nisi ‘o faiā’oga ‘ua ‘ausia le 20 tausaga talu ‘ona faiā’oga, ma ‘i lātou ‘ua fa’au’uina ‘i nisi fa’ailoga maualuluga.

ATA: Anna Fa’asolo / Sāmoa Capital Radio.