Fa’atau le fale tīfaga ‘o le Reading Cinema ‘i le laumua ‘i Uēligitone

‘Ua talia ‘e le Pulenu’u ‘o Uēligitone, le fa’ai’uga ‘e fa’atau ‘ese atu ai le fale tīfaga ‘o le Reading Cinema ‘i le Courtney Place, ‘ina ‘ua lē manuia se fuafuaga ‘i le tausaga ‘ua mavae, ‘e fa’aalu ai se vaegātupe ‘e $32-miliona ‘e toe fa’aleleia ai lea faletīfaga.

‘E pei ‘ona silafia, ‘o le faletīfaga lenei ‘o le Reading Cinema ‘i le Courtney Place, na tāpuni ‘i le tausaga ‘e 2019, ‘ina ‘ua iloa ‘i ni su’esu’ega sā faia, ‘e lamatia tele ai le saogalēmū ‘i le taimi ‘e lūlū ai se mafui’e tele.  ‘E tusa ma le 1.5 hectares le telē ‘o le ‘ele’ele ‘o lo’o tū ai lenei faletīfaga, ‘o se ‘ele’ele ‘ūmia sa’oloto, lea ‘ua fa’atauina nei ‘e le kamupanī fa’atau fale ma fanua, ‘o le Primeproperty Group.

‘O le tausaga ‘e 2023, sā taumafai ai le Pūlega ‘o le ‘a’ai ‘o Uēligitone ‘e lātou te fa’atauina le fanua lenei ‘ona toe lisi atu ai lea ‘i le Reading Cinema, peita’i ‘o le tausaga na te’a nei lea na toe fa’apafala ai lea fuafuaga.  Na fa’ailoa mai ‘i le vāiaso nei ‘e le tama’ita’i Pulenu’u ‘o Tory Whanau, ‘ua ia talia le fa’ai’uga ‘a le kamupanī ‘e fa’atau’ese atu lea ‘ele’ele, ‘ua talafeagai ma fuafuaga mō le toe saga fa’aleleia ‘o lea vāega ‘o le laumua.

‘O le kamupanī ‘o le The Primeproperty  lea ‘ua fa’atauina le fanua lenei ‘o lo’o tū ai le Reading Cinema, ‘o lātou fo’i ia ‘e ona le faletalimālō ‘e igoa ‘o le Amora Hotel, lea na ‘āmata tāpunia talu mai le tausaga ‘e 2017.

Link to RNZ (Article) translated by Lauano Ilaoa:https://www.rnz.co.nz/news/business/538284/woolworths-has-applied-to-commerce-commission-to-buy-ready-meal-manufacturer