Fa’ata’ita’iga tele ‘a le itūmālō Canterbury ma le Motu ‘i Saute ‘i se mafui’e tele ‘e ono tupu mai.

‘O le vāiaso nei ‘e fa’atinoina ai se fa’ata’ita’iga tele, ‘e 12 ītūlā le ‘umi ‘e tāpenaina ai mō le taimi ‘e tūla’i mai ai se mafui’e tele ‘e āfāina ai le motu ‘i saute.  ‘Ua tele māsina ‘o fa’agāsolo mai le fuafuaina ma le tāpenaina ‘o lenei polokalame, ‘o le ‘ā aofia ai tagata ‘e to’atele ‘i itūmālō tetele ‘o le motu ‘i saute.   ‘E iva le aofa’iga ‘o pūlega po’o Councils ‘o le motu ‘i saute, ‘o lo’o a’afia ai ‘i lenei polokalame, ‘e aofia ai ma le pūlega ‘o le itūmālō Canterbury ma le silia ‘i le 20 ‘o ‘ōfisa ma matāgāluega ‘a le Mālō, ‘ae fa’apea fo’i le vaegā’au po’o le fitafita ‘a Niu Sila ma nisi ‘o kamupanī ma fa’alāpotopotoga.

‘O le ali’i pule ‘o le ‘Ōfisa ‘o le Itūmālō Canterbury mō le pūlega ‘o fa’alavelave fa’afuase’i, ‘o Phill McKay, ‘o le ‘ā ta’ita’i ‘i lenei polokalame, ‘e fa’ata’ita’i ai le fa’atinoina ‘o gāluega fesoasoani ma gāluega lavea’i ‘i le taimi ‘e a’afia ai le Motu ‘i Saute ‘i se mafui’e mālosi ‘e āfua mai ‘i le Alpine Fault lea ‘e lavea ai se vāega tele ‘o le Motu ‘i Saute ‘o Niu Sila.  ‘O ia itū’āiga ‘o fa’ata’ita’iga ‘e ta’i fā tausaga ma faia ‘i itū ‘ese’ese ‘o Niu Sila, ‘ina ‘ia mautinoa ‘e silafia ‘e tagata ‘aemaise ‘ōfisa ma fa’alāpotopotoga ‘e a’afia ‘i gāluega lavea’i ma gāluega fesoasoani o lātou tiute fai, ma ‘ia manino ai fo’i ma silafia lelei ‘e tagata ‘uma mea ‘e tatau ‘ona faia ‘i le taimi ‘e tutupu mai ai ni fa’alavelave mata’utia fa’alenātura ‘i le lumana’i.

 Link to RNZ (article) translated by Savelina Kasiano:https://www.rnz.co.nz/news/national/532716/major-south-island-civil-defence-exercise-to-take-place

Ata: NASA – The Alpine Fault.