Fa’asilasila le faiga fa’avae ‘autū tau tupe ‘a le Pāti ‘o le Labour
‘O lea ‘ua fa’ailoa mai fa’alaua’itele le fuafuaga ‘autū tau Tupe ‘a le Pātī ‘a le Labour, lea ‘ua folafola mai ai, ‘ā fai ‘o le ‘ā tūla’i mai ‘i lātou ‘i le ta’ita’iga ‘o le faigāmālō, ‘e soso’o ai nei, ‘o le ‘ā o lātou taumafai loa ‘ina ‘ia o’o atu ‘i le tausaga ‘e 2029/30, ‘ua maua se fa’asiliga ‘o tupe maua mai tupe fa’aalu ‘a le Mālō, ma fa’aitīitia ‘aitālafu ‘a le Mālō ma fa’avaeina ai se ‘ōfisa fa’apitoa mō le pūlea ‘o le Tala ‘o le Tupe ‘a le Palemene.
‘Ua fa’ailoa mai ‘e le Ta’ita’i ‘o le Labour, ‘iā Chris Hipkins, ‘o le ‘ā āga’i la lātou pātī ma le faigāmālō ‘o le ‘ā lātou ta’ita’ia, ‘e fa’aleleia le tūlaga ‘o tusi ma mea tau tupe ‘a le Mālō, ‘i se faiga ma se ‘auala ‘e lē afaina ma mafatia ai tagata lautele ‘o le atunu’u, ‘e pei ‘o le fa’aitīitia ‘o ‘au’aunaga māsani ‘a le Mālō, lea ‘o lo’o faia ‘e le faigāmālō ‘o lo’o iai nei.
Sā ia fa’amamafaina, ‘o le ‘ā ‘inivesi le Labour ‘i ni polokalame ‘o le ‘ā fa’aleleia ma fa’amālosia ai ‘au’aunaga tau ‘i le soifua mālōlōina, ‘aemaise ‘o mea tau ā’oga, fa’apea gāluega tetele ‘e ā’oga mō tagata ‘uma ma le ātīna’eina ‘o tomai ma agava’a mana’omia mō pisinisi ‘ina ‘ia mautinoa ‘e tele ai avanoa faigāluega ‘e maua.
‘O fuafuaga ‘autū tau tupe lenei ‘a le Labour, ‘e ono ni faiga fa’avae ma’oti ‘o lo’o aofia ai:
Na fa’ailoa mai ai ‘e le Sui So’o’upu ‘a le Labour mō matā’upu tau Tupe ma le Tamāo’āiga, le afioga Peseta Barbara Edmonds, ‘o lenei fuafuaga ‘o le ‘ā mafai ‘ona fa’apāleni ai tusi ‘a le Mālō ma fa’aitīitia ai ‘aitālafu, ma maua ai le avanoa mō tagata ‘o le atunu’u ‘e fa’atino ai ni ātīna’e mō lō lātou lumana’i.
Na ia tā’ua ai, ‘o le ‘ā āga’i le Labour ‘e faia fuafuaga ‘ina ‘ia aulia atu le tausaga 2029/30 ‘ua maua se fa’asiliga ‘o tupe maua ‘a le mālō mai tupe fa’aalu ‘i ana gāluega fai ma fa’asolosolo atu ai ‘ina fa’aitīitia le aofa’i ‘o ‘aitālafu ‘a le Mālō.
Sā fa’aalia fo’i ‘e Peseta, ‘o le faigāmālō ‘o lo’o iai nei ‘i lalo ‘o le ta’ita’iga ‘a le National, lea ‘ua o’o ai i se tūlaga aupito ‘i maoa’e ‘i totonu ‘o le sefulumaletasi tausaga ‘ua mavae atu nei, le aofa’iga ‘o tagata ‘o Niu Sila ‘ua lēai ni gāluega, ‘e lē gata ‘i lea, ‘ua o’o ai ‘i le 71 pasene le aofa’i ‘o pisinisi ‘ua gau ma tāpuni, ‘ua fa’atupula’ia ai le aofa’i ‘o tagata ‘ua lēai ni fale ‘e nonofo ai, ma o’o ai ‘i se tūlaga maoa’e le aofa’i ‘o tagata ‘ua tala ‘i tua a lātou KiwiSaver ‘ona ‘ua lēai se isi mea ‘e tāgolima ‘i ai, ma ‘o le tele ‘o ‘au’aunaga māsani ‘a le mālō ‘ua āfāina ma iai ‘i se tūlaga fa’alētonu.
Link to RNZ (Article): https://www.rnz.co.nz/news/politics_election-2026/1081146/labour-releases-fiscal-strategy-promises-to-slash-debt
IMAGE/ATA: Baz Macdonald/RNZ