Fa’aseā Winston Peters ‘i le BSA ona o ā lātou fuafuaga mō ni ta’iala fou

‘Ua fa’aseā le ta’ita’i ‘o le NZ First Vaovasamanaia Winston Peters ‘i le BSA le Broadcasting Standards Authority, ona o ni ā lātou fuafuaga mō ni ta’iala fou, na fa’asilasila ‘i le vaiaso nei. ‘O fuafuaga fou ‘a le BSA ua fa’aalia ai le fa’aopoopo ‘o ni ālafua mō fa’asalalauga ‘i luga ‘o ‘upega o feso’ota’iga. Na tu’uina atu se tusi fa’aseā a le BSA e fa’asaga ‘i le polokalame o le The Platform, ona ‘o ni fa’amatalaga fa’ailoga lanu sa faia ‘i luga o le polokalame, ‘i le aso 22 ‘o Iulai tausaga nei. ‘i le taimi muamua na maua ai ‘e le Platform le tusi, sā ō lātou tē’enaina lea tusi, ma fa’amanino ‘i le BSA, ‘e lē a’afia la lātou polokalame ‘i lalo ‘o tūlāfono mō fa’asalalauga a Niu Sila.

‘O lo’o iai se fete’ena’iga o finagalo fa’aalia ‘i lea matā’upu, ‘o lo’o fīnau ai Sean Plunket mai le Platform, ‘e fa’apea e lē fetaui le a’apa mai ‘o le BSA ‘i fa’asalalauga ‘e faia luga le initaneti. ‘I se fa’amatalaga ‘a le pule sili ‘o le Free Speech Union Jillaine Heather, ‘e ono ‘avea lea ma pā puipui pe taotaomia ai aiā tatau e ‘ūmia sa’oloto mo tagata Niu Sila. ‘Ua vala’au le Free Speech Union ‘i le mālō, ina ‘ia fa’amanino ‘i le BSA le vāega tonu ‘e gata mai ai ā latou ta’iala ma tūlāfono, ma ‘ia ‘aua ne’i āiaina ‘e le BSA fa’asalalauga ‘i luga ‘o le Initaneti.

‘I se fa’amatalaga mai le pule sili ‘o le BSA Stacey Wood, ‘e fa’apea ‘o lo’o taumafai ‘e fa’amanino mai, ‘o lalo ‘o tūlāfono mo fa’asalalauga ‘i Niu Sila, ‘o broacasters po’o tagata fa’asalalau, latou te fa’asalalauina polokalame, ‘e fa’asalalau mō tagata lautele, ‘auala atu i so’o se ‘auala mō fa’asalalauga, ‘e lē fa’atapula’a mō na’o TV ma leitiō. ‘O le fīnau mai e Plunket ‘o lē ‘o lo’o fa’asaga iai le fa’aseā ‘a le BSA, ‘e fa’apea ‘e leai se pule ‘a le BSA iā te ia, ma o le BSA Act na ‘amata fa’amamaluina ‘i le 1989, ‘o lo’o manino ai e mō na’o Televise ma Leitiō. ‘E leai fo’i sana laisene fa’asalalau, ‘e tatau ai ona āofia ‘i lalo o lea tūlafono.

Link to RNZ (Article) translated: https://www.rnz.co.nz/news/political/576015/winston-peters-accuses-broadcasting-standards-authority-of-soviet-era-stasi-censorship

ATA: RNZ / Mark Papalii