Fa’asalaina le tinā Waikato ‘ona ‘o vailā’au ‘e 15 ‘i totonu ‘o lana pepe

‘O se lauulu ‘o se tamaitiiti ‘e 2 tausaga le matua na su’esu’eina, na mafai ai ‘ona iloa, ‘e 15 ni vailā’au ‘o’ona ‘i totonu ‘o lona tino, ‘e aofia ai le methamphetamine, pauta ‘o’ona ‘o le cocaine fa’apea ai ma le ketamine.  Na maua fo’i le methamphetamine ‘i totonu ‘o ana fe’au vai. 

‘I nai aso muamua atu, na maua atu ai le tinā, ‘ua lē mānava ‘i se fale Airbnb ‘i Waikato, ‘a’o si’osi’omia ‘e ni fuālā’au ma vailā’au ‘ese’ese fa’atasi ai ma ni meafaitino ‘e fa’aaogā pe ‘ā tagofia ia vailā’au ‘o’ona.

Na ‘ave ‘e se tagata faigāluega ‘a le Oranga Tamariki le tamaitiiti ‘i le Falema’i ‘i Waikato, lea na su’esu’eina ma māua ai, le tele ‘o vailā’au ‘i totonu ‘o lona tino ‘e aofia ai le MDMA, oxycodone, diazepam, nordiazepam ma le norketamime.  Na fai si ‘ōnā tele ‘o lona tinā ‘i ‘ia vailā’au, na faigatā ai ‘ona fa’atalanoa ‘e leoleo ‘i lea taimi ‘i le māsina ‘o Fepuari 2024. 

Na tūla’i le tinā ‘e 20 ma ona tupu tausaga le matua, ‘i le Fa’amasinoga Fa’aitūmālō ‘o Hāmilitone mō le tōlaulauga ‘o lona fa’asalaga mai se mōliaga ‘o le lē lelei ‘o le va’aiga ‘o le tamaitiiti ‘e ala ‘i le lē puipuia ‘o ia mai ia fuālā’au ma vailā’au ‘o’ona. 

Na fa’aalia ‘e lana lōia ‘i le fa’amasinoga, ‘ua mafai ‘ona fō’ia ‘e le tinā lona nanau ‘i fuālā’au fa’asāina.  Na ia talosagaina ai le fa’amasino ‘ina ‘ia ‘aua ne’i toe fa’aopoopoina se isi fa’asalaga ‘o le tinā, ‘ona ‘e 6 aso na tāofia pe loka ai, 10 māsina ‘o ia tau’aveina se masini ‘e tulituliloa ma tulimata’i lelei ai ana gāioiga, ma le isi 10 māsina sā tatala ai ‘i tua ‘i lalo ‘o tu’utu’uga māsani ‘a’o fa’atali lana matā’upu.  Na tu’uina atu ‘e Fa’amasino Tompkins le fa’asalaga ‘o le 9 māsina ‘e nofo va’ava’aia ai. 

Link to RNZ (Article): https://www.rnz.co.nz/news/crime-and-justice/1137474/waikato-mother-sentenced-after-toddler-had-15-drugs-in-his-system

IMAGE/ATA: RNZ / Cole Eastham-Farrelly