Fa’asala le kamupanī ‘inisiua ‘a le AA ‘i le $6.17 miliona ‘i ni uiga tau fa’asesē ‘ua ‘ova totogi ai tupe ‘e tagata

‘E $6.175-miliona ‘ua fa’asalaina ai ‘e le Fa’amasinoga Maualuga se tasi ‘o kamupanī ‘Inisiua ‘i Niu Sila nei, ‘ona ‘o ni faiga tau fa’asesē na ‘ova ai le totogiina ‘o ni vaegātupe ‘e tagata ‘o lo’o fa’aaogāina le lātou ‘au’aunaga ‘i le aofa’iga ‘e sili atu ma le 11-miliona tālā.

‘O le kamupanī ‘inisiua ‘o lo’o a’afia, ‘o le AA Insurance New Zealand, po’o le AAI, ‘e pei ‘ona lausilafia ai.

Na tā’ua ‘i le fa’ai’uga ‘a le Fa’amasinoga, ‘e le’i fa’atinoina ‘e le kamupanī ‘a le AAI lana faiga fa’avae mō tupe ‘e fa’apa’ū po’o discounts mō tagata ‘e tele a lātou polisi ‘ātoa ma isi vāega ‘e aofia ai pōnesi ‘e pei ‘ona fa’asalalauina fa’alaua’itele.

Na fa’amanino mai ai le ta’ita’ina sesē lea ‘o tagata ‘e le kamupanī ‘a le AAI, ‘e tusa ai ‘o le lātou discount pe ‘āfai ‘e lua pe sili atu le aofa’iga ‘o pōlisi ‘a se tasi, ‘ātoa ai ma le lē sa’o ‘o fa’amatalaga ‘e tusa ‘o le faiga ‘o pōnesi ‘e tā’ua ‘o le “no claims policy for life”

Na ‘ioeina ‘e le kamupanī ia fa’alētonu ‘i luma ‘o le fa’amasinoga ‘e ‘auala atu ‘i le ‘Ōfisa ‘e Pūlea Māketi tau Tupe, po’o le Financial Markets Authority, le FMA.

Na fa’aalia mai ai ‘e le Fa’atonu ‘o le kamupanī ‘inisiua ‘a le AA ‘o Michelle James, ‘o le taimi ‘e tūlai mai ai ni sasi fa’apēnei, ‘e vave ‘ona āga’i le kamupanī ‘e fa’asa’o ‘ina ‘ia tūmau ma ‘āto’atoa lana ‘au’aunaga mō tagata ‘uma.

Sā ia fa’amaualalo ai fo’i ‘ona ‘o ia fa’alētonu ma sasi ‘o le kamupanī ‘i le vā ‘o le tausaga ‘e 2000 ma le 2022, ma ‘ua āga’i nei le AAI ‘e toe fa’aola sēleni ‘a tagata ‘o loo a’afia, ‘o se aofa’iga ‘e tusa ma le 15.6-miliona tālā, ‘e aofia ai ma le tului.

Link to RNZ (Article) translated by Lauano Ati Ilaoa: https://www.rnz.co.nz/news/national/530061/aa-insurance-fined-over-misleading-no-claims-bonus-offer

ATA: AA Insurance.