Folafola ‘e le Kiwi Mobile le fa’amuta ‘o tupe maumau ‘i data ‘o telefoni fe’avea’i ‘e lē fa’aaogāina

‘E iai se kamupanī fou mō feso’ota’iga televavave, ‘ua ‘āmataina se ‘au’aunaga, ‘e fa’atatau ‘i data ‘o telefoni fe’avea’i ia ‘e totogi ‘ae lē ‘uma ‘ona fa’aaogā.  Sā faia se sā’ili’iliga ‘a le Kiwi Mobile, ma iloa ai ‘e silia ma le 400 miliona tālā le tau ‘o data ‘e totogi mō telefoni feavea’i, ‘ae lē fa’aaogāna ‘e tagata Niu Sila ‘i tausaga ta’itasi.  Pe tusa ma le 6.7gigabytes ‘o data ‘e totogi ‘i le māsina ‘e tagata Niu Sila, ‘ae lē fa’aaogāina. 

‘E silia ma le ‘afa ‘o tagata ia na fesiligiaina po’o le 58 pasene, na o lātou fa’aalia, ‘e iai lo lātou talitonuga, ‘o lo’o tele atu tupe ‘o lo’o lātou totogiina mo ni data lātou te lē mo’omiaina ma le 68 pasene na o lātou fa’aalia, ‘e manana’o ‘ina ‘ia telē le avanoa ‘e mafai ai ‘ona fesuia’i le faiga ‘o fuafuaga ‘i le totōgiga ‘o data ‘e mafai ai ‘ona fa’aaogā feso’ota’iga a lātou telefoni.  ‘Ua ‘āmataina ‘e le Kiwi Mobile, se fuafuaga fou mō le taimi muamua, ‘e fa’apea ‘e fa’asao ai tupe ‘a tagata ‘e aunoa ma le iai ‘o ni tapula’a ‘iā lātou data po’o vāega ia ‘e mafai ai ‘ona ola telefoni ‘i feso’ota’iga ‘i le initaneti. 

‘E lē filifili muamua tagata fa’atau pe fia ni data lātou te fia fa’aaogāina.  ‘E ‘āmata mai le ta’i $1.30 ‘i le aso ‘e maua ai le data mō le feso’ota’iga saoasaoa ‘e o’o atu ‘i le 5GB.  ‘A ‘uma ia data, ‘e mafai ‘e tagata ‘ona filifili pē fa’aauau pea le fa’aaogaga ‘o data ‘i se saoasaoa ‘e maualalo ifo nai lō le taimi muamua pe sui fo’i ‘i se isi faiga ‘e ala ‘i le toe fesuia’i ‘o le tau ‘e totogi ‘i le aso mō taimi ia ‘e totoe ‘o lana pili fa’alemāsina. 

Mō se fa’ata’ita’iga, āfai ‘e totogi ‘e se tagata le $65 ‘i le māsina mō data ‘e 15GB ‘ae ‘uma ane ‘e na’o le 9GB na te fa’aaogāina, ‘e mafai ‘e le Kiwi Mobile, ‘ona ofo atu na’o le $44 ‘e totogi ‘e le tagata ‘e fa’aaogāina ai GB ‘e 9.  ‘Ona lē maumau lea ‘o data ia ‘e totogi ‘ae le’o fa’aaogāina.

Link to 1news (Article) translated by Savelina Kasiano: https://www.1news.co.nz/2024/09/23/kiwi-mobile-pledges-an-end-to-paying-for-wasted-mobile-data/

ATA: Kiwi Mobile’s Andy Cooper says consumers will benefit from the new approach. (Digitally enhanced image.)