Fa’apopoleina pisinisi ‘i le tāpunia ‘o le ‘auala tele ‘autū āga’i ‘i le West Coast

‘Ua fa’apopoleina le tele ‘o pisinisi ‘i le West Coast po’o le Talafātai ‘i Sisifo ‘o le Motu ‘i Saute, ‘i le lēai ‘o ni tūrisi ‘e o’o atu ‘i lea vāega ‘o le atunu’u, talu ai le motusia ‘o le ‘auala tele ‘autū mō fēmalāgā’iga ‘i mātū ‘o le nu’u ‘o Haast.

Sā iloga ‘ona pagātia lea vāega ‘o Niu Sila ‘i uiga fa’alētonu ma le loulouā ‘o le tau ‘i le fa’ai’uga ‘o le vāiaso mā ‘o le afiafi ‘o le Aso Sā ananafi, lea na fa’ato’ā fa’alēaogāina ai le tūlaga ‘o pūlega ‘i taimi ‘o fa’alavelave fa’afuase’i, sā fa’amamalu ai ‘i saute ‘o le pitonu’u ‘o Westland.  ‘E tele mea na fa’aleagaina ai, ‘e aofia ai lōlōga ma fa’aleagaina ai fale ‘o tagata, ‘ātoa ai ma solo ‘ele’ele na fa’aleagaina ai ‘auala ma isi mea tōtino ‘i le Aso To’ona’i.

Peita’i lā, ‘o le ‘auala ‘autū le State Highway 6 ‘o lo’o tāpunia pea ‘i le vā ‘o Haast ‘i le itū ‘i saute ma le Fox Glacier ‘i le itū ‘i mātū, mā ‘e lēai se isi ‘auala ‘e mafai ‘ona ‘alo ‘i ai tagata ma ta’avale fēmalāga’i.  ‘O lea fa’afītāuli, ‘ua lē mafai ai nei ‘ona feoa’i tagata ‘i nisi nu’u ma vāega ‘o Westland, ‘o lona uiga ‘o tagata ‘e fia malaga ‘i le vā ‘o Haast ma  Franz Joseph, fa’apea Ross, Hokitika po’o Greymouth, ‘e tatau ‘ona uia le Arthurs Pass poo le Lewis Pass, mō le ‘umi ‘e 12 ītūlā ‘e malaga ai.

Na fa’ailoa mai ‘e le Pūlega ‘o ‘Auala Tetele, le Waka Kotahi, ‘o le māvaevae ‘o le ‘auala ‘i le Knight’s Point ‘i mātū ‘i Haast, ‘o se tūlaga ‘e fa’apopoleina ai.  ‘O lo’o fautuaina ai ‘aveta’avale ma tagata femalāga’i ‘ina ‘ia fa’aeteete ‘i ia tūlaga.

Link to RNZ (Article) translated by Lauano Ati Ilaoa: https://www.rnz.co.nz/news/national/533372/west-coast-main-highway-cut-off-businesses-worried

ATA: Supplied / NZTA.