Fa’apa’iaina le Malumalu Tapua’i ‘a le ‘Ekālesia Metotisi Sāmoa Matāgaluega ‘a Tanetini (Dunedin)

‘O le taeao ‘o le Aso Faraile 12 ‘o Iuni 2026 ‘i le ‘a’ai ‘o Dunedin ‘i le motu ‘i saute ‘o Niu Sila na fa’apa’iaina ai le Malumalu Tapua’i ‘a le ‘Ekālesia Metotisi Sāmoa Matāgaluega ‘a Tanetini (Dunedin).

‘O le Afioga ‘i le Peresetene ‘o le ‘Ekālesia ‘iā Rev. Faulalo Leti Pa’aga na ta’ita’ia le sauniga, fa’atasi ai ma le Afioga ‘i le Failautusi ‘o le ‘Ekālesia ‘iā Rev. Eteuati Tuioti, fa’apea ai Afioga ‘i Ali’i Sea ‘o Sinoti ‘o le ‘Ekālesia ‘i Aotearoa Niu Sila nei.

Na saunoa le Susuga ‘i le Tausi Matāgaluega ‘iā Rev. Misionare Tuitama’i ‘e fai ma sui ‘o le Matāgaluega ‘i Tanetini (Dunedin), ‘e fa’amālamalama le fa’amoemoe ma le galuega. Na fa’ailoa ‘e le Susuga ‘iā Misionare, ‘o le tau aofa’i ‘o le fa’amoemoe ‘e $1.2 miliona (NZD), ma na fa’atauina ai le fanua, le malumalu, le hall fa’apea le maota ‘o le galuega.

‘O le tausaga fou 2027 ‘o le ‘a ‘atoa ai le 50 tausaga ‘o le galuega ‘a le ‘Ekālesia Metotisi Sāmoa ‘i totonu ‘o Tanetini, na fa’avaeina ‘i le Aso 27 ‘o Fepuari 1977, ‘ae ‘o se fiafiaga mō ‘i la’ua ma le Faletua ‘iā Lolofa Tuitama’i ma le ‘Ekālesia, ‘ina ‘ua mafai ‘ona fa’amautūina se nofoāga patino mō le galuega ‘a le ‘Ekālesia ‘i le ‘a’ai ‘o Tanetini.

CAPTION: Rev. Misionare & Faletua Lolofa Tuitama’i
IMAGE/ATA: SCR (file)