Fa’apa’ia le ‘ele’ele ‘e fausia ai fale ‘e 300 mō Pasefika ‘i Porirua

‘O le aso ananafi ‘i le 10 ‘i le taeao, na faia ai le sauniga fa’apitoa, ‘e fa’apa’ia ai le ‘ele’ele, lea ‘o le ‘ā fausia ai fale ‘e 300 mō tagata Pasefika ‘i Porirua.  ‘E to’atele sui ‘o tagatā nu’u Pasefika, le mālō, ‘au faipisinisi ma tagata lautele na ‘āuai ‘e molimauina lenei fa’amoemoe. ‘O le Susuga Rev. Tui Sopo’aga, ‘o le ‘Ēkālēsia Fa’apotopotoga Kerisiano Tokelau ‘i Porirua na feagai ma le saunigā lotu.

‘O saunoaga ‘autū ‘o le fa’amoemoe; ‘o le fa’atonu ‘o le Central Pacific Collective, Fa’amatuainu Tino Pereira, Pulenu’u ‘o Porirua, Anita Baker, Helmut Modlik’ le fa’atonu ‘o le Te Runanga Toa Rangatira, ma le Minisitā ‘o Matā’upu tau Ātīna’e mō Māori, Hon Tama Potaka.  ‘I le saunoaga ‘a Fa’amatuainu Tino Pereira, na ia fa’afetaia ai le Faipule ‘o Mana, Barbara Edmonds ma le Afioga ‘iā Aupito Su’a William Sio, ‘i lo lā sao ‘ le fīnauina ‘o le tupe, lea na fa’amatu’u mai ‘e le faigāmālō talu ai, ‘auā lenei fa’amoemoe mō le Pasefika. ‘O le suaina ‘o le ‘ele’ele na feagai ma ‘i lātou na faia saunoaga ‘autū, fa’atasi ai ma tama ma teine talavou, na fai ma sui ‘o Motu ‘o le Pasefika. ‘O lenei ‘ele’ele po’o le fanua, ‘ua lisiina atu ‘e le Ngāti Toa, ma ‘ua māe’a tāpena le fanua tele lenei mō le fausiaina ‘o fale ‘e 300.

Article written by Tufue Fiso (SCR) presented by Savelina Kasiano. 

Ata: Sāmoa Capital Radio