Fa’aosofia ‘e le Pili ‘o le Treaty Principles fetaua’iga fa’alōtoifale, saunoa ai Jenny Shipley

‘O lapata’iga ‘a se tasi na ‘avea ma Palemia Dame Jenny Shipley, ‘ua tatala ‘e le Vāega Fa’a’upufai ‘a le ACT le avanoa ‘e tutupu mai ai ni taua fa’alōtoifale, ‘i lana taumafaiga ‘e fa’auiga matā’upu fa’avae ‘o le Feagaiga ‘o Waitangi ‘i se tūlāfono.  Na pāsia ‘i lona faitauga muamua le pili, Treaty Principles Bill ‘i le Palemene ‘i le Aso Tofi talu ai, lagolagoina ‘e le ACT, National ma le New Zealand First.  ‘Ua ‘uma ‘ona fa’aleo ‘e isi vāega fa’aupufai ‘o le faigāmālō so’ofa’atasi, ‘o le ‘ā lē lagolagoina le pili pe ‘ā ‘uma le faitauga muamua.  A’o le faitauga muamua ‘o le pili, na sasae ai ‘e le faipule pito la’itiiti ‘o le Palemene, le tama’ita’i ‘o Hana-Rawhiti Maipi-Clarke ‘o Hauraki Waikato ‘o le Vāega Fa’a’upufa’i ‘a Māori, le kopi ‘o le tūlāfono taufa’aofi, ma ‘āmataina se haka, na lagolago atu ‘i ai ma faipule ‘o le Itūagai ma ni sui fa’alogologo sā iai ‘i le Maota Fono.  ‘Ua fa’aleo le lagolago ‘a Dame Jenny ‘iā Maipi Clarke. 

‘O Dame Jenny, sa ta’ita’ia le Vāega Fa’a’upufai ‘a le National mai le 1997 ‘e o’o mai ‘i le 2001 mā na ‘avea ma palemia mō ia tausaga ‘e lua.  Na ia saunoa, na te manatua le Bastion Point, ma na fesoasoani le Feagaiga ‘iā ‘i lātou, sā ‘avea ‘o se ta’iala.  ‘A si’isi’i finagalo ‘o tagata, ‘e toe fa’afo’i ai lava ‘i lātou ‘i le mea na iai, ‘o se fefa’auōa’iga ‘e tūmau ma ‘e taumafai ai tagata ‘e sa’ili le la’asaga ‘i luma.  Ma ‘i lona manatu, ‘ua matuā talafeagai lava le fa’apisapisaō ‘o finagalo ‘i le vāiaso talu ai, mā ‘o le si’ufofoga ‘o Māori, ‘e fa’amanatu mai ai ‘iā ‘i tātou, ‘o le maliliega lenei, ‘o se konekarate, ma ‘e lē mafai ‘ona sasae se konekarate ma fa’apea, ‘o lea ‘ua ‘ou fiafia ‘e toe tusi le konekarate ‘i o’u lava lagona ma a’u tu’utu’uga, ‘ae lē taulia ‘oe.  Na saunoa Dame Jenney, ‘ana ‘o ia, ‘e si’isi’i fo’i lona leo.  ‘E lagona lona mitamita ‘o lea ‘ua fa’ailoa ‘e le National, ‘o le ‘ā lē fa’aauauina lana lagolago ‘i le Pili, ‘ona ‘e lē mafai ‘e se tasi ‘ona tautala mai itū ‘uma ‘e lua ‘o lona gutu. (se’i tulou)

‘Ua folafola ‘e le Tupu Tama’ita’i ‘o Māori, Nga wai hono i te po, ‘o le ‘ā ‘āuai ‘i le hikoi ‘i le Palemene, ma ‘e na te lē taliaina ni faiga ‘e ta’ufa’atauva’aina ai le Feagaiga ‘i Waitangi.  Muamua atu sa saunoa ai le Palemia Christopher Luxon, ‘e lēai se fesoasoani ‘e maua mai lenei pili, ma na saunoa fo’i se tasi na ‘avea ma Minisitā mō Feūtaga’iga ‘o le Feagaiga, Chris Finlayson, ‘e telē lava le a’afiaga ‘e o’o ‘i le so’otaga ‘ā le National ma Māori, ‘ona ‘o le tu’uavanoa ‘e fa’apāsia le pili ‘i lona faitauga muamua.

Link to RNZ (Article) translated by Savelina Kasiano: https://www.rnz.co.nz/news/political/533944/treaty-principles-bill-inviting-civil-war-jenny-shipley-says

ATA: Samuel Rillstone / RNZ / Craig McCulloch.