Fa’aopoopoina tagata na tofo ‘i lole ‘o iai le methamphetamine

‘Ua fa’aopoopoina lava le nūmera ‘o tagata ‘ua tofoina lole ia ‘o lo’o iai totonu le vailā’au po’o fuālā’au fa’asāina ‘o le methamphetamine ‘e tusa ai ma molimau ‘a nisi ‘o i lātou sa tufaina ‘i ai pusa ‘o taumafa. 

Na tufatufaina ‘e aunoa ma le iloa ‘e le Auckland City Mission ni poloka ‘o pauta po’o fuālā’au fa’asāina ‘o le methamphetamine, na āfīfī ma tūsia ai ‘e fa’apea ‘o ni lole ‘e gaosi mai fala, ma sā i totonu ‘o ni pusa ‘o taumafa.  Na āfīfī ia fuālā’au fa’asāina ‘e fa’afōliga ‘i ‘oloa ‘o taumafa ‘a le kamupanī Meleisia ‘o le Rinda Food Industries. Na tā’ua ‘e se tinā ‘ua ‘ātoa nei le 4 ma le ‘afa tausaga ‘e le’o toe tagofia fuāla’au fa’asāina, fa’ato’ā ia iloa ‘o ni fuālā’au fa’asāina ‘ae ‘ua ‘uma ‘ona tofo ‘e lona tuagane laitiiti ma lana tama ia fuālā’au fa’asāina na fa’afōliga mai ‘i ni lole, peita’i na tofo ma tia’i ‘ona ‘e ‘o’ona.  Ma sā ia ta’uina ‘i lana uō lea na su’eina ‘i luga ‘o le Google, ma fautua ane loa ‘iā te ia, ‘e logo le ‘ōfisa ‘o leoleo.  Sā ia tofoina mulimuli ane, ma ia iloa ai, ‘o le methamphetamine.  ‘I se pepa ‘o fa’amatalaga na tā’ua ai ‘e le pule sili ‘o lea kamupanī, ‘ua o lātou logotala ‘i lea matā’upu ‘e ala ‘i līpoti ma tala fou ‘i Niu Sila. Ma sā fa’amanino ai ‘e le ali’i pule Steven The, ‘e lē fa’aaogāina ‘e le Rinda Food ni fuālā’au fa’asāina ‘iā lātou ‘oloa.  Ma ‘o le ‘ā o lātou gālulue ma leoleo ‘a Niu Sila ‘e sa’ili le fa’apogai ‘o le fa’afītāuli ma puipui ‘i le igoa ‘o la lātou pisinisi.  Na tā’ua ‘e leoleo, ‘o fuālā’au fa’asāina nei na tufatufaina, ‘e telē lava le tūlaga lamatia ‘o le atunu’u ‘e maua ai mā ‘e le’o tu’umāmāina ‘e la lātou matāgāluega lenei matā’upu.  ‘O le ‘ā o lātou aoina uma lole po’o fuālā’au fa’asāina nei sā maua i ātigipusa ‘o taumafa.

Link to RNZ (Article) translated by Savelina Kasiano: https://www.rnz.co.nz/news/national/525180/it-tasted-like-poison-meth-lollies-tasted-by-more-food-parcel-recipients

ATA: Supplied / Sarita Kaukau (RNZ).