Fa’aopoopo mālosi’aga ‘ōfisa femalāgā’iga ‘e fesiligia ai tagata ‘ua masalomia le ‘ova ‘o aso

‘E le’o toe mamao ‘ae maua ‘e tagata faigāluega ‘o le ‘Ōfisa ‘o Femalāgā’iga le mālosi’aga ‘e fesiligia ai tagata ‘o lo’o masalomia ‘ua ‘ova aso fa’atūlafonoina ‘i totonu ‘o Niu Sila, mō ni o lātou pepa fa’amaonia ‘i totonu ‘o ‘āiga ma fale faigāluega.

Na fa’asilasila ‘e le mālō ‘i le tausaga talu ai ‘i le māsina ‘o Sētema ni suiga ‘i le fa’atūlagaga ‘o aiāiga ‘a le ‘ōfisa ‘o femalāgā’iga ‘e fa’amālosi ātili ai le polokalame ‘o le toe fa’afo’i fa’amālosi ‘o tagata ‘i atunu’u na ō mai ai.  ‘O se tasi ‘o ia aiāiga, ‘o le maua lea ‘e tagata faigāluega ‘o le ‘ōfisa ‘o le paoa, ‘e fesiligia ai ni fa’amaumauga ‘o fa’amaoniga mai ni tagata lātou te masalomia ‘ua solia aiāiga ‘o lātou visa.

Na saunoa le Minisitā ‘o Femalāgā’iga, Erica Stanford ‘i le Leitiō Niu Sila, ‘e telē le fa’afītāuli ‘o tagata ‘ova aso ‘i le atunu’u, ma ‘e tatau ‘ona ‘iai se mālosi’aga ‘i tagata ‘o le ‘ōfisa, ‘e mafai ai ‘ona tāpā fa’amatalaga mai tagata pe ‘ā fai ‘ua lātou masalomia, ‘ua solia aiaiga ‘o lātou visa. 

‘Ae na saunoa se tasi ‘o lōia mō matā’upu tau ‘i femalāgā’iga, Alastair McClymont ‘o se tama’i fa’afītāuli lava le tūlaga ‘i tagata ‘ova aso ‘i totonu ‘o Niu Sila, ma ā fai ‘e lē fa’amanino lelei ‘e le mālō le māfua’aga ‘autū ‘e mafai ai ‘ona fesiligia ‘e se tagata ‘o le ‘ōfisa ‘o femalāgā’iga se tagata mō sona ID, ‘o le ‘ā ono o’o ai ‘i se tūlaga, ‘o le fesiligia ai ma tagata sitiseni Niu Sila ‘o lo’o fa’atino a lātou gāluega māsani ‘i totonu ‘o ‘āiga po’o fale faigāluega, ‘ina ‘ia tu’u atu ni fa’amaoniga po’o ai ‘i lātou. 

‘E folasia ‘e le mālō le tūlāfono ‘i le Palemene ‘i le māsina fou, ma le fa’amoemoega ‘e pāsia ‘e ‘avea ma tūlāfono ‘a’o le’i māe’a lenei paeā’iga.

Link to RNZ (Article) translated: https://www.rnz.co.nz/news/political/587825/immigration-officers-to-get-increased-powers-to-ask-suspected-overstayers-for-identification

ATA: Nick Monro / SCR