Fa’aopoopo ‘i le 18 māsina le ‘umi ‘o laisene mai fafo

‘Ua toe fa’aopoopo ‘e le mālō mō se taimi lē tūmau le ‘umi ‘o le taimi ‘e mafai ai ‘e ‘aveta’avale ‘ona fa’aaogā o lātou laisene mai fafo, mai le 12 māsina ‘i le 18 māsina.  Na fa’aalia ‘e le Minisitā ‘o Fela’ua’iga, Simeon Brown, ‘e lē taliaina le tūlaga ‘o lo’o tūla’i mai, ‘o le lua ‘o māsina ‘o fa’atalitali, ‘ona ‘e silia ma le 70,000 tagata ‘o fa’atalitali mō su’ega ‘aveta’avale. 

Na fa’aalia ‘e le Minisitā, na te tu’ua’ia le faigāmālō ‘ua mavae ‘i le tuai, ‘ona ‘o le ‘ave’esega ‘o tau ‘e totogi ‘e toe su’e ai su’ega, ‘ua māfua ai le si’itia ‘o le nūmera ‘o tagata ‘e su’e laisene ‘aveta’avale.  ‘O le taimi fa’aopoopo lea ‘ua folafola ‘e le mālō, ‘o le ‘ā ‘āmata fa’amamaluina mai ‘iā Nōvema ma fa’aauau ‘i le isi lua tausaga.  ‘O le fa’anaunauga ‘o le faigāmālō so’ofa’atasi, ‘ina ‘ia 90 pasene ‘o su’ega ‘o laisene, ‘ia faia ‘i totonu ‘o aso ‘e 30 ia na fa’atonu ai a lātou su’ega.

Link to RNZ (Article) translated by Savelina Kasiano: https://www.rnz.co.nz/news/national/530165/drivers-use-of-international-licences-extended-to-18-months

ATA: Sāmoa Capital Radio (file).