Fa’anatinati ‘e le Mālō fuafuaga mō tau ‘e totogi ‘i le fa’aaogaga ‘o ‘auala tetele

‘Ua ‘ioe le kapeneta ‘e tu’u atu le fa’atagaga ‘i pūlēgānu’u ‘e amata ai ‘ona totogi ‘e tagata le fa’aaogaga ‘o ‘auala tetele ‘i taimi pito pisi ma tūtumu ai ‘auala ‘i feoa’iga, mā ‘o le ‘ā folasiaina le tūlāfono ‘i le tausaga nei, pei ‘ona saunoa ai le Minisitā ‘o Fela’ua’iga, Simeon Brown.

‘O lea faiga, po’o (congestion charges) ‘e fa’amoemoe ‘e fa’aitīitia ai le pisi ‘o ‘auala tetele, ‘e ala ‘i le totogi ‘e so’o se tasi ‘e fa’aaogāina le ‘auala ‘i taimi ‘ese’ese po’o ni ‘a’ai ma itūmālō ‘ese’ese, ‘e fua ‘i le pisi ma le tumu ‘o ia ‘auala.  ‘O lea tupe ‘e totogi, ‘e ūna’ia ai nisi tagata ‘e sui le taimi, ‘auala, po’o se metotia ‘o faigāmalaga, po’o le filifili fo’i ‘e nofo ‘i le fale.

Na saunoa le Minisitā, ‘o le ‘ā mafai ‘ona ‘āmata fa’atino ‘e pūlēgānu’u ni polokalame ‘o taimi ‘e fa’aaogā ai lea faiga, ma ‘e ‘ave lava le fa’amuamua ‘i le Pūlēgānu’u ‘a ‘Aukilani.  ‘O lea fuafuaga, ‘o se tāumaūga ‘i le maliliega ma le ACT ‘a le faigāmālō so’ofa’atasi.  Na saunoa le Minisitā, ‘o nei polokalame, ‘e fa’aitīitia ai taimi feoa’i ‘i luga ‘o ‘auala pito pisi, ma fa’atuputeleina ai le ola ‘o le tamāo’āiga.  ‘O le ‘ā gālulue fa’atasi le Lālā ‘o Fela’ua’iga, le Waka Kotahi ma pūlēgānu’u ‘e tāpena ni polokalame ‘o taimi ‘e tatau ‘ona totogi ai ia tau, ma fuafua pe fia tupe ‘e tatau ma onomea ‘ona totogi ma tūlaga pito sili ‘ona talafeagai ‘i le fegāsoloa’iga ‘o ta’avale mō ‘a’ai ma itūmālō ta’itasi pei ‘ona fa’aalia ‘e le minisitā. 

Link to RNZ (Article) translated by Savelina Kasiano: https://www.rnz.co.nz/news/political/524883/government-accelerates-congestion-charging-plans

ATA: Transport Minister Simeon Brown. (RNZ) / Reece Baker.