Fa’amuta le ‘upega ‘o feso’ota’iga ‘a le TVNZ (1News) ‘i le tausaga fou 2025

‘Ua fa’ailoa mai ‘e le TVNZ, ‘o le ‘a tāpunia ‘e lē toe faia le latou ‘upega ‘o feso’ota’iga mō talafou, le 1News website, ‘i le tausaga fou, ‘i se vāega ‘o fuafuaga ‘e fa’asaoina ai tupe alu ‘a le fa’alāpotopotoga.

Sā talanoaina lenei matā’upu, ‘i se fono ‘a le ‘aufaigāluega ‘ātoa ‘a le TVNZ ‘i le Aso Gafua, sā ‘au’ili’ili ai vāega ‘e mafai ‘ona fa’asaoina ai se vāegatupe ‘e o’o ‘i le $30 miliona tālā mai ana gāluega fai.

‘O le ‘amataga ‘o le tausaga nei, na fa’amuta ai fo’i ‘e le TVNZ nisi ‘o ana polokalame ‘o talafou ma mea tutupu, ‘e aofia ai ma le polokalame ‘o le Fair Go, ma puletini ‘o talafou ‘i le aoāuli ma le pō.

Sā fa’aālia mai ‘e le fa’atonu ‘o le TVNZ ‘o Jodi O’donnell ‘iā ‘Aukuso, ‘e fa’apea, ‘o lo’o lava pea seleni ‘a le fa’alāpotopotoga ‘e fa’atino ai lana polokalame le Digital Strategy mō le isi tolu tausaga ‘o lumana’i, ‘ae ‘o le ‘a lē mafai ‘ona faia ai se tūfatūfaga mō le ‘au fa’asoa ‘e pei ‘ona māsani ai.

‘E tusa ma le $85 miliona tālā le gau ‘o le TVNZ ‘i le tausaga nei fa’atusa ‘i le pōlōfiti ‘e $1.7 miliona na maua ‘i le tausaga ‘i ona tua.

Link to RNZ (Article) translated by Lauano Ati Ilaoa: https://www.rnz.co.nz/news/national/530025/tvnz-plans-to-end-its-1news-website-in-february

ATA: TVNZ in Auckland. RNZ / Marika Khabazi