Fa’amuta gāluega ‘e 173 ‘ōfisa ‘o leoleo ‘e fa’asao ai le silia ma le $50 miliona

‘Ua fa’amaonia ‘e leoleo le fuafuaga ‘e fa’amuta ai gāluega ‘e 173 ‘ina ‘ia fa’asaoina ai le silia ma le 50 miliona tālā mō le isi 4 tausaga ‘o lumana’i.  ‘O le māsina ‘o ‘Aukuso na fa’atalanoa ai le ‘aufaigāluega ‘i se fuafuaga ‘e fa’amuta ai gāluega ‘e 170, ma sā fa’amaonia ai le aofa’iga ‘e 173 ‘i le vāiaso talu ai.  Na fa’aalia ‘e le sui pule sili Andrea Conlan, ‘o le fa’ai’uga lea na faia ‘o le fa’amutaga ‘o avanoa faigāluega, peita’i ‘e le’o iloa pe to’afia le ‘aufaigāluega ‘o le ‘ā vāea se’ia o’o atu ‘i le fa’ai’uga ‘o Nōvema, pe ‘ā ‘āmatalia se fa’atūlagaga fou ‘ua tāpenaina. 

‘O avanoa ia ‘o le ‘ā fa’amuta, ‘o le ‘ā fa’afetaui ai tomai ‘o le ‘aufaigāluega ia ‘o le ‘ā a’afia ai a lātou gāluega, ma toe tofi āga’i ‘i ni avanoa faigāluega fou pei ‘ona aofia ‘i totonu ‘o fa’atalanoaga.  ‘E 51.6 miliona tālā le tupe ‘a leole ‘e fa’asaoina ai ‘i le 4 tausaga ‘o lumana’i.  E 253 le aofa’iga ‘o avanoa po’o gāuega ‘o le ‘ā fa’amutaina ‘e aofia ai le 135 ‘o lo’o avanoa pē lēai nisi ‘o gālulue ai ‘i le taimi nei.  ‘O le ‘ā ‘āmata nisi gāluega fou se 80, ‘ona tūla’i mai lea ‘o le aofa’iga ‘o gāluega ‘o le ‘ā fa’amālōlō pe vāea ‘i le 173.

Link to RNZ (Article) translated by Savelina Kasiano: https://www.rnz.co.nz/news/national/530974/police-to-axe-173-jobs-in-bid-to-save-more-than-50m-over-four-years

ATA: Police say no front line roles will be part of the cost-cutting measure (file image). Photo: RNZ / Cole Eastham-Farrelly