Fa’amāvae atu le Mafutaga Faife’au so’o fa’atasi ‘i Ueligitone, ‘i Toa Manumanu ‘o le Talalelei na tautua ‘i le Laumua

‘O le afiafi ‘o le Aso Faraile ‘o le ‘a fa’amāvae atu ai le Mafutaga Faife’au so’o fa’atasi ‘i Ūeligitone, Porirua ma le Hutt Valley ‘i nisi ‘o le ‘aufaigaluega ‘o le ‘a tu’ua le mafutaga ‘ina ‘ua mae’a ai la lātou tautua ‘i le laumua nei.

‘O le Susuga ‘i le Toeā’ina ‘iā Fa’atulituli Setu ma le Faletua ‘iā Meripa ‘ua mālōlō penisione ai nei ‘i le mae’a ai ‘o le 20 tausaga sa ‘au’auna ma ‘avea ai ‘i lā’ua ma Faife’au ‘o le ‘Ekālesia EFKS ‘i le Hutt Valley, ma sa filifilia fo’i ‘e fai ma Toeā’ina Fa’atonu ‘o le latou pūlega.

‘Ae ‘o le Susuga ‘i le Tausi Matāgaluega ‘iā Fua Tuisaletolo ma le Faletua ‘iā Fofoaivaoese sa gālulue ma ‘au’auna ‘i le ‘Ekālesia Metotisi Sāmoa ‘i Taita, ma ‘ua mā’ea le 7 tausaga ‘o le la ‘au’aunaga ma ‘o le ‘a fa’apea ‘ona si’itia atu ‘i New South Wales ‘e fa’aauau ai le tautua ‘i le Atua ma lona finagalo.

‘E fa’apea fo’i ‘i le Tausi Matāgaluega ‘iā Misionare Tuitama’i ma le Faletua ‘iā Lolofā, sa gālulue ‘i le ‘Ekālesia Metotisi Sāmoa ‘i Tawa, ma ‘o le ‘a si’itia atu ‘i Dunedin ‘i le Motu ‘i Sāsāe’ ‘e fa’aauau ai le la ‘au’aunaga, ma ‘o le ‘a misia ‘i latou ‘e le Mafutaga Faife’au so’o fa’atasi ‘i la latou tautua ‘e auala ‘i Faigālotu, Mōlī ‘o le Ava’ fa’apea Asiasiga ‘o Aso Faraile, ma ‘o le ‘a fa’ataunu’u lea fa’amāvaega ‘i le ‘afa ‘o le 5 ‘i le afiafi ‘o le Aso Faraile ‘i le ‘Ekālesia EFKS Cannons Creek ‘i Porirua.