Fa’amanino pili ‘e totogi ‘i fōma’i fa’ale’āiga (GPs)

‘E mafai ‘e fōma’i fa’ale’āiga ‘ona fa’atūlaga ā lātou lava totogi mō gasegase ‘i Niu Sila. Na tu’uina mai se fa’amanīnoga ‘i luga ‘o le TV1, fa’atatau ‘i pili ‘ese’ese ‘e totogi ‘e tagata pe ‘a asiasi atu ‘i GPs. ‘E ui ‘e āgava’a tamaīti ‘i lalo ifo ‘o le ta’i 14 tausaga mō su’esu’ega fa’alesoifua mālōlōina ‘e āunoa ma se totogi, ma ‘o lo’o pa’ū fo’i le va’aiga  o’ fōma’i mo ‘i lātou ‘e fa’aāogāina  Community Services Card, peita’i, ‘e telē le ‘ese’esega ‘o pili ‘e totogi ‘i GPs ‘i pitonu’u ‘ese’ese ‘i totonu ‘o Niu SIla.

‘I le au’ili’iliga ‘o lea matāupu, ‘e fa’amatalaina fa’apea, ‘e fa’atupe ‘e le mālō GPs ‘i lalo se polokalame tā’ua ‘o le capitation. ‘I lalo ‘o lea polokalame, ‘e maua ai ‘e fōma’i tupe mō tagata ta’ito’atasi ‘ua resitalaina iā ‘i lātou ‘i tausaga ta’itasi, ‘ae lē totōgia ai taimi ‘e asiasi atu ai mō se fesoasoani pe ‘a gasegase. ‘E lē ‘o gasegase uma ‘e faʻatupeina mō le āofaʻiga tutusa ‘i lalo ‘o lenei faiga. ‘O tūlaga ‘i le fa’atupega ‘e ‘ese’ese, ‘e fa’atatau ‘i vāega, ‘e pei ‘o le matua o le soifua, ma le ītūpā ‘o ali’i ma tama’itai, pei ‘ona fa’aalia ‘e Dr Angus Chambers, ‘o le ta’ita’ifono ‘o le ‘asosi ‘o GPs I Aotearoa. ‘Ae ūi ‘i lea, ‘o lenei polokalame ‘o le fa’atupega ‘o ‘au’aunaga mō fōma’i fa’ale’āiga, ‘e faʻavae ‘i luga ‘o faʻamaumauga mai le silia ma le 20 tausaga talu ai.

‘O faiga māsani ‘e mana’omia ‘ona fuafua ‘e fōma’i, pē fia tupe lātou te mo’omia ‘e totogi ‘i tausaga ta’itasi, ‘e totogi ai tau ma fa’atūmauina ai ā lātou pisinisi. ‘O le ta’iala lea na tu’uina mai ‘e le Matāgaluega ‘o le Soifua Mālōlōina. ‘E fautuaīna ai le māualuga ‘o pasene ‘e mafai ‘e fōma’i ‘ona si’i ‘i luga ‘o lātou pili ‘i tausaga ta’itasi, ‘e fa’atatau ‘i le tau ‘o le soifuaga ‘i lea taimi ma lea taimi, fa’apea ‘i tagata faigāluega ma isi tupe fa’aalu. ‘E 7.76% le tau na fa’ataga le si’itaga ‘i le tausaga nei. ‘E mafai ‘e fōma’i ‘ona filifili ‘e fa’aopoopo ā lātou pili ‘e sili atu nai lō le māliliega ma le matāgaluega, ‘ae tāpāina fa’amaumauga ma fa’amatalaga ‘e le matāgaluega, pe ‘a faia iloiloga.

ATA: 1News