Fa’amamaluina 1 Oketopa suiga fou ‘o tūlāfono ‘o ‘auala

‘E 4 ni aiaiga fou ‘ua ‘āmata fa’amamaluina ‘i le asō, 1 ‘Oketopa, mō ‘auala tetele.  ‘O le fa’amoemoega ‘o ia suiga, ‘ina ‘ia ātili saogalēmū ‘auala, manino lelei aiaiga ma tūlāfono, ma fa‘aitīitia pūlega ‘e faigatā ai femalāgāa‘iga māsani ‘a tagata ‘i aso ‘uma pei ‘ona saunoa le Minisitā ‘o Fela’ua’iga Chris Bishop ‘i le ‘āmataga ‘o le tausaga nei.

‘O suiga ia, ‘e aofia ai, le tatau lea ‘i le ‘aveta‘avale ‘ona tu’u se avanoa ‘e 1.5 mita pe ‘ā pāsia isi tagata ‘o lo‘o fa‘aaogāina le ‘auala, ‘o tagata ia ‘e lē ‘o ‘aveina ni ta‘avale afi.  Na fa’aalia ‘e le NZTA, ‘e tatau ‘i ‘aveta’avale, ‘ona lē itiiti ifo ma le 1.5 mita le mamao ‘ese ‘o le ta’avale pe ‘ā pāsia isi tagata ‘o lo’o fa’aaogāina le ‘auala, ma tasi le itū ‘o lo’o āga’i fa’atasi ‘i ai.  ‘Ā fai ‘e lē saogalēmū ‘ona pāsia ia tagata, ‘o le fautuaga ‘a le NZTA, alu lēmū ma fa’atali pea se’ia o’o ‘ina mafai ‘ona pāsia ma le saogalēmū. 

‘Ia fa’ataga tamaiti ‘e o’o atu ‘i le ta’i 12 tausaga le mātutua, ‘ona ti’eti’e ‘i uila ‘i luga ‘o ‘auala sāvavali (footpaths) ma fa’ataga fo’i mātua po’o tagata ‘o lo’o va’aia tamaiti, ‘ona ti’eti’e fa’atasi ma tamaiti.  ‘Ia fa’ataga tagata ‘e ti’eti’e ‘i e-scooters ‘i luga ‘o ‘auala ‘ua fa’apitoa mō uila vili vae.  ‘E tatau ‘i tagata ‘e fa’aaogāina le ‘auala (po’o ‘aveta’avale) ‘ona tu’u avanoa ‘i pasi ‘i taimi ‘e tu’ua ai nofoaga fa’atali pasi po’o bus stop.

‘E tatau ‘i le ‘ave pasi  ‘ona fa’ailoa lona mana’oga ‘o lea ‘e fia alu ‘ese ma le fale fa’atali pasi, ‘ia lē itiiti ifo ma le 3 sekone, ‘ina ‘ia lava le taimi mō ‘aveta’avale ‘e fai ai lana gaioiga, ma maua ai fo’i le taimi mō le ‘avepasi ‘e siaki ai, po’o ‘ua avanoa lelei le ‘auala. 

‘O ia suiga, ‘o se vāega ‘o suiga ‘a le Mālō mō aiaiga ‘i fela’ua’iga ma feoa’iga ‘i le lau’ele’ele, ‘e aofia ai le fa’aaogāga ‘o laisene mai faiga fa’atēkonolosi ‘i se taimi ‘e le’o toe mamao.

Link to RNZ (Article): https://www.rnz.co.nz/news/community/1662993/explainer-what-you-need-to-know-about-road-rules-changing-on-1-october

IMAGE/ATA: Phil Pennington/RNZ