Fa’alauiloa suiga tetele ‘i le su’ega ‘o laisene ‘aveta’avale

‘O le fa’aaliga ‘a le mālō, ‘e taugōfie atu mō tagata ‘e fia su’e laisene ‘aveta’avale, le suiga tele lea ‘ua o lātou faia, pei ‘ona folasia ‘e le Minisitā ‘o Fela’uā’iga Chris Bishop ‘i le Aso Lua ‘i ‘Aukilani, ‘ona ‘e taugatā le faiga ‘o lo’o iai nei, ma ‘ua leva, ‘e le’o toe talafeagai ma o’o ‘i le tūlaga ‘e tatau ‘ona iai. 

‘O le suiga pito sili lea ‘ona telē ‘i lea polokalame talu mai le tausaga ‘e 2011, ‘ina ‘ua si’i ‘i le 16 tausaga mai le 15, le matua ‘e tatau ai ‘ona agava’a le talavou ‘i le laisene a’oa’o (learner). 

‘O le ‘ā lē toe iai ni su’ega mō laisene ‘ātoatoa (full licence), mō le Class 1 po’o ta’avale māsani. ‘E lē toe faia se su’ega ‘e sui ai mai le laisene ‘e iai tu’utu’uga fa’apitoa po’o le restricted āga’i ‘i le laisene ‘āto’atoa. 

‘E 12 masina le piliota mō le laisene a’oa’o mō ē ‘i lalo ‘o le ta’i 25 tausaga le mātutua, ‘ua fa’aopoopo le 6 māsina.

‘E iai le filifiliga mō tagata ‘i lalo ‘o le ta’i 25 tausaga le mātutua, ‘e fa’aitīitia le piliota ‘o le 12 māsina ‘o le laisene a’oa’o, āga’i ‘i le 6 māsina ‘e ala ‘i le pu’e ‘o ītūlā ia ‘e faia ai lana a’oa’oga pe ‘ua māe’a fo’i sana lēsona po’o le course ‘ua fa’atagaina, na a’o ai lana ‘aveta’avale.

‘E $80 ‘o le ‘ā fa’apa’ū ‘ese mai le tau ‘ātoa ‘o le su’ega ‘o le laisene ‘i lalo ‘o le polokalame fou ‘o laisene. 

‘O le ‘ā toe fa’aopoopo le isi ono māsina ‘i le laisene ‘e iai tu’utu’uga fa’apitoa po’o le restricted licence pe ‘ā fai ‘e fa’asala ‘i maka leaga po’o demerits. 

‘O ‘aveta’avale ‘uma lava ‘e iai laisene a’oa’o ma laisene ‘e iai tu’utu’uga fa’apitoa, tusa lava po’o le ā le matua, ‘o le ‘ā aofia ‘i aiāiga ‘o le fa’asā lea ‘ona tagofia ‘o le ‘ava mālosi pe ‘ā ‘ave le ta’avale.  ‘O le ‘ā maua fo’i ‘e le Lālā ‘o Fela’uā’iga ‘a Niu Sila se isi mālosi’aga fou ‘e māta’itūina lelei ma fa’asala ai fo’i ‘au’aunaga ‘e faia a’oa’oga mō ‘aveta’avale.  ‘O le aso 25 Ianuari 2027 ‘o le ‘ā ‘āmata fa’amamaluina ai ia suiga.

Link to RNZ (Article) translated: https://www.rnz.co.nz/news/political/585787/driver-licence-system-overhaul-unveiled

ATA: Supplied.