Fa’alaua’itele mai ‘e le mālō se polokalame fou ‘e fa’aitīitia ai sauaga matagā ma sauaga ‘i totonu ‘o ‘āiga.

‘O lea ‘ua fa’alaua’itele mai ‘e le faigāmālō so’ofa’atasi, se polokalame fou ‘e fa’amoemoe ‘e fa’aitīitia ai sauaga ‘i totonu ‘o ‘āiga, ‘ātoa ai ma sauaga matagā.  ‘O le Aso Sā ananafi lea na fa’ailoa mai ai fa’alaua’itele  lenei polokalame fa’atino lona lua mō le puipuia ‘o sauaga ‘i totonu ‘o ‘āiga ‘ātoa ai ma sauaga matagā, ‘e le tama’ita’i minisitā ‘e feagai ma lea matāgāluega, ‘o Karen Chhour.

Sā fesoasoani ‘i ai ma le minisitā ‘o Leoleo, ‘o Mark Mitchell fa’apea le tama’ita’i Minisitā ‘o Ātīna’e Lautele, ‘o Louise Upston.  ‘O le igoa ‘o le polokalame lenei, ‘o le Te Aorerekura Action Plan, ‘o lo’o aofia ai fuafaga fa’atino mō le isi 25 tausaga, mō le fa’amoemoe ‘e puipuia ma fa’aitīitia ai le aliali mai pea ‘o sauaga ‘i totonu ‘o ‘āiga po’o le family violence, ‘ātoa ai ma sauaga matagā, po’o le sexual violence.

Na fa’aalia mai ‘e le minisitā ‘o leoleo, ‘o Mark Mitchell ‘o se tasi ‘o ‘autū ‘o lenei polokalame, ‘o le mafai lea ‘ona gālulue felagolagoma’i ai ‘o le tele ‘o ‘ōfisa ma matāgāluega ‘ese’ese ‘a le mālō, ‘e tali atu ai ‘i taimi ‘e tūla’i mai ai nei itū’āiga ‘o fa’afītāuli ‘i totonu ‘o le atunu’u.

Peita’i lā, na fa’aalia mai ‘e le sui so’o’upu ‘o le Pātī ‘a le Labour mō matā’upu tau ‘i sauaga matagā ma sauaga ‘i totonu ‘o ‘āiga, ‘o Ginny Anderson, ‘e lē ‘o manino po’o le ā tonu le mea lelei ‘ua maua ma mafai ‘ona fa’atino ‘e le faigāmālō ‘i le polokalame lenei. Na tā’ua ‘e Anderson, ‘o lea ‘ua ‘āmata le vāega ‘e lua ‘o le polokalame, ‘ae lēai se līpoti ma se ‘upu ‘a le minisitā ‘e tusa ‘o le vāega muamua ‘o le Te Aorerekura, ‘o se polokalame na ‘āmata mai ‘e le faigāmālō ‘a le Labour.

Link to RNZ (Article) translated by Lauano Ilaoa:https://www.rnz.co.nz/news/political/536771/family-violence-funding-review-could-see-services-lose-out-critics

ATA: Ginny Andersen, Labour’s spokesperson for the prevention of family and sexual violence. RNZ / Samuel Rillstone