Fa’aitīitia taimi fa’atalitali mō tusifolau

‘Ua ‘afa le taimi fa’atalitali mō tusifolau Niu Sila ‘e tusa ai ma se fa’amatalaga ‘a le Minisitā ‘o Matā’upu ‘o le Lōtoifale. 

Na līpotia ‘i le ‘āmataga ‘o le tausaga nei ‘e le 1News, taimi fa’atalitali fa’ato’ā maua se tusifolau pe tusa lea ma le 10 vāiaso.  Na fa’atoese le Matāgāluega ‘o le Lōtoifale ‘ona ‘o le ‘umi ‘o taimi fa’atalitali, ma ‘o le māfua’aga, ‘ona ‘o le fa’aleleia ‘o le polokalame ‘e fa’agāioi ai le faiga ‘o tusifolau lea na ala ai ‘ona tele talosaga na fa’atuai ‘ona fa’agāioi.  ‘O ananafi na tā’ua ai ‘e le Minisitā Brooke van Velden, ‘e silia ma le 57 pasene na pa’ū ai le ‘umi ‘o taimi fa’atalitali po’o le 31,000 mai le 53,847 sa iai ‘i le ‘āmataga ‘o Mē.  ‘O Iūlai ‘e tusa ma le 50,397 tusifolau na tu’uina atu  ‘i tagata na talosaga ‘ae silia ma le 10,700 na tele atu ai tusi folau na māe’a ‘ona fa’agāioi ma tu’uina atu ‘i tagata nai lō tusi talosaga na fa’ao’oina atu ‘i le matāgāluega. Na ‘āmata ‘ona fa’aleleia le polokalame ‘iā Mati pei ‘ona tā’ua ‘e le Minisitā,  mā ‘o le agaga fiafia ‘ona ‘ua mafai ‘e tagata Niu Sila ‘ona fa’aaogāina ia faiga fou, ‘e faia ai se talosaga ‘i luga ‘o ‘upegatafā’ilagi ma fa’afaigōfie atili ai le faiga ‘o talosaga mō tusifolau.

Link to 1News (Article) translated by Savelina Kasiano: https://www.1news.co.nz/2024/08/06/software-upgrade-helping-reduce-passport-wait-times/

ATA: Sāmoa Capital Radio (file).