Fa’ailoa mai au’ili’iliga ‘o fuafuaga ‘a le mālō mō le fa’aleleia ‘o le Matematika ‘a tamaiti ā’oga.

‘O lea ‘ua fa’ailoa mai fa’alaua’itele au’ili’iliga ‘o se fuafuaga ‘a le faigāmālō ‘o lo’o tū nei ‘i le foe, mō le fa’aleleia ‘o le tomai ‘o tamaiti ā’oga ‘i le maā’aupu ‘o le Matematika po’o le Numera.  Na fa’aalia mai ‘e le tama’ita’i Minisitā ‘o Ā’oga, ‘iā Erica Standford, ‘e $2-Miliona Tālā se vaegātupe, ‘o le ‘ā fa’aalu ‘e le Matāgāluega ‘i se polokalame fa’ata’ita’i  ‘e fa’a’āto’atoa ai lēsona mō le Matematika mō vāsega ‘o le Tausaga 7 ma le Tausaga 8 ‘i le tausaga ‘ā sau.
Na ia tā’ua ‘e fa’apea, ‘o lenei polokalame fa’ata’ita’i, ‘e aofia ai ni vasega to’aitiiti ‘e fesoasoani ‘i ai se faiā’oga mō le ‘afa ītūlā, mō le aofa’iga ‘e ta’i fā vasega ‘a le tamaitiiti ‘i le vaiaso ‘e tasi, mā ‘o le ‘ā fa’aaogāina ai feso’ota’iga televavave (online).  Na tā’ua ‘e le tama’ita’i Minisitā, ‘ā fai ‘o le ‘ā lelei ma manuia nei fa’ata’ita’iga, ‘e mautinoa, ‘o le ‘ā fa’alautele atu lenei polokalame ‘i le lumana’i.

‘E lē gata ‘i lea, ‘ae sā fa’alaua’itele mai  fo’i ‘e le minisitā, le fuafuaga ‘a le faigāmālō, ‘e fa’aalu le $30-Miliona Tālā, ‘i tusi ma alagā’oa mō ā’oga lāiti fa’apea ma ā’oga fa’aleogalua po’o intermediates. 
‘Ua fa’ailoa mai nei au’ili’iliga ‘i le tuana’i ai ‘o se fa’asalalauga ‘a le Mālō ‘i le māsina ‘o ‘Aukuso, na tā’ua ai ‘o le ‘ā tu’u mai ‘i luma le ‘āmatalia ‘o se curriculum fou ‘o le Matematika mō ā’oga, ‘i le ‘āmataga ‘o le tausaga fou, 2025.

 Link to RNZ (article) translated by Savelina Kasiano:https:https://www.rnz.co.nz/news/political/532821/govt-announces-2m-funding-for-trial-of-catch-up-maths-lessons

Education Minister Erica Stanford: Ata: RNZ / Samuel Rillstone