Fa’ailoa ma fa’amāasiasi ‘i se līpoti fou tagata ‘e va’aia fale nofo mautotogi

‘O kamupanī tetele ‘e pei ‘o le Bayleys ma le Quinovic, ‘o lo’o tā’ua ‘i totonu ‘o se līpoti fou, ‘o pule ma tagata ‘o lo’o va’aia fale nofo mautotogi ma meatōtino ‘a isi tagata.  ‘O ia fale, ‘e legalegā, mālūlū ma susū. 

‘O le i’uga ‘o su’esu’ega ‘o le Aotearoa Renters Survey, pei ‘ona fa’atinoina ‘e le Renters United and Action Station, ‘ua toe fa’ama’ite mai ai ni vala’au ‘ina ‘ia fa’amausalī lelei tūlāfono mō tagata ‘o lo’o pūleaina ia meatōtino. 

‘O fa’alāpotopotoga po’o kamupanī ‘e mālūlū a lātou fale, ‘e nūmera muamua ai le LJ Hookers, ‘e 28%, Bayleys ‘e 16.7%, 15.2% le Quinovic, 14.4% le Barfoot & Thomson, 14.9% le Harcourts ma isi kamupanī ‘e i lalo ifo ‘o le ta’i 13 pasene.  ‘O fale ‘e pito ‘e sosolo ai le lega po’o le limu, mālūlū ma sao atu ‘i ai le sau mālūlū, ‘e nūmera muamua ai le Bayleys, ‘e 63.2%, 58.8% le Quinovic, 53.8% le Crockers, 52.6% le Barfoot & Thompson, ta’i 50% mō le LJ Hooker ma le Oxygen, ma isi kamupanī ‘e i lalo ifo ‘o le ta’i 50 pasene. 

Na tā’ua fo’i ‘i le līpoti, ‘e silia ma le 40 pasene ‘o tagata na fa’ailoa atu ‘i ai, ‘o o lātou fale, ‘e ui ‘e ‘ausia le tūlaga fa’atūlāfonoina ‘e tatau ‘ona iai fale ‘e maua ai le soifua mālōlōina (Healthy Homes standards), peita’i, ‘o lo’o iai pea ni nai fa’afītāuli ‘e pei ‘o le legalegā, susū ma le sao atu ai ‘o le savili mālūlū. 

‘E silia ma le ‘afa ‘o tagata ‘o lo’o nonofo ‘i fale ‘a le Baylys, Quinovic, Barfoot & Thompson ma le Crockers homes, na maua ai fa’afītāuli ‘o le legalegā, mālūlū ma le sao atu ‘i ai ‘o le sau.  Mai le silia ma le 3000 ‘o tagata nofo mautotogi na fesiligia ‘i lea sā’ili’iliga, ‘e 500 na o lātou tā’ua igoa ‘o pule ‘o lo’o va’aia a lātou fale mautotogi.   

Na tā’ua ‘e nisi fa’alāpotopotoga ‘o lo’o va’aia ma pūleaina fale nofo mautotogi ma meatōtino ‘a isi tagata, ‘e fa’apea ‘ua lātou lē toe taliaina landlords po’o tagata ‘e ana fale nofo mautotogi ‘e mumusu ‘e fa’aleleia a lātou fale ‘ina ‘ia ‘ausia le tūlaga lelei pei ‘ona fa’atūlāfonoina, ‘ina ‘ua fa’amālosia le aso na fa’agataina ai le ‘ausia ‘o tu’utu’uga mō Healthy  Homes ‘i le tausaga talu ai.

Link to RNZ (Article): https://www.rnz.co.nz/news/business/1120121/worst-property-managers-named-and-shamed-in-new-report

IMAGE/ATA: SCR (file).