Fa’ailoa le tusi fou ‘a Nicky Hager, tā’ua ai le Iuni ‘a le ‘au failāfoga

‘Ua fa’alauiloa ‘e le tusitala su’esu’e ‘o Nicky Hager sana tusi fou ‘ua fa’aigoaina ‘o le Dirty Work, ma ‘ua tā’ua ‘e fa’apea, ‘o se tusi ‘ua fa’ailoa ai gāluega po’o āmioga ‘a le Iuni ‘a le ‘Au fai lāfoga po’o le Taxpayers’ Union.

‘O le fīnau ‘a Hager pei ‘ona tūsia ‘i lea tusi, na fa’aaogāina ‘e le Taxpayers’ Union, ni fa’a’upuga fa’atōsina ‘e tete’e ai ‘i Māori, ‘o se meafaigāluega fa’apolokiki, ‘aemaise lava ‘i le taimi ‘o la lātou fa’atōsina ‘o le Stop Three Waters, ma i’u ‘ina sifi pe lilifa ai fa’atōsina ‘o faigāpālota 2023 ‘i le itū taumatau.

‘O le mau fo’i ‘a le tusitala su’esu’e, na liliu le taula’iga ‘a le ta’ita’i ‘o le Act David Seymour fa’apea ma le ta’ita’i ‘o le National Tuisinavemauluomotootua Christopher Luxon āga’i ‘i lea itūā’iga fa’atōsina, ‘ina ‘ia maua ai ni a lā pālota.  Na ta‘ua e Hager, ‘o le tusi lenei ‘o le Dirty Work po’o Gāluega Palapalā, ‘o le vāega lona tolu ‘o se fa’asologa ‘o ana tusi ‘e tolu, lea na amata mai ‘i le The Hollow Men.  ‘O le tusi lona tolu lā lea na tulimata’i toto’a ai ‘i le Taxpayers’ Union. 

Na fa’aalia ‘e Hager, na fa’atūlaga ‘e le TU, se polokalame po’o se fa’atōsina ‘e faitau miliona, sa fesoasoani ‘e sifi ai le faigāpālota ‘o le 2023 ‘a Niu Sila ‘i le itū taumatau.  ‘O tagata ‘autū ‘o le tusi, ‘e fa’asino ‘i ē na fa’avaeina lea polokalame, ‘e aofia ai Jordan Williams ma David Farrar fa’apea ai ma le isi fa’alāpotopotoga na fa’aigoaina ‘o le Hobson’s Pledge, na fa’atūlagaina lea ‘e Don Brash. 

Na fa’aalia ‘e Hager, ‘o le tusi ‘o le Dirty Work, ‘o lo’o fa’amatala mai ai le ‘auala na fa’agāsolo ai se tauiviga fa’apolokiki fa’ailoga lanu, fa’atasi ai ma le fa’aauau pea ‘ona osofa’i, tauemua ma fa’aleaga sui tauvā ‘o isi vāega fa’a’upufai.  

Na fa’aalia ‘e le tusitala, ‘o le tala ‘i totonu ‘o le tusi, ‘e fa’atatau ‘i faiga fa’atemokalasi.  ‘O le tusi fo’i lenei ‘o le Dirty Work ma isi vāega muamua ‘o le fa’asologa ‘a ia tusi, ‘ua fa’ailoa ai le faigōfie ‘ona liliu ma suia manatu ‘i ‘auala lē lelei, ‘ae ‘o lo’o fa’amatala mai ai fo’i, le lē lava ‘o vāega ‘ua ‘uma ‘ona fa’atūlaga ‘e puipuia ai le atunu’u, ‘e pei ‘o ‘au’aunaga ‘o tala fou, tūlāfono ‘o faigāpālota ma isi mea ‘e tele, pei ‘ona tā’ua ai ‘i le Leitiō Niu Sila.  ‘Ua ātili fa’ateteleina fo’i le tūgā ‘o le fa’afītāuli, ‘o le tele ‘o le fa’aaogāga ‘o feso’ota’iga fa’aonapō nei fa’atasi ai ma le mou atu ‘o fa’asalalauga sā māsani mai ai (traditional media).

Na lafoina ‘e Williams se ‘īmeli ‘i ana ‘au lagolago ‘ina ‘ua ‘uma ‘ona fa’alauiloa le tusi ‘a Hager, sa ia fa’ailoa atu ai, ‘o se matuā osofa’iga lava ‘ua faia ‘e lea tusi, ‘i le Taxpayers’ Union, ‘o ia fa’apea ma Farrar.  Na saunoa Williams, ‘o lea ‘e fai mai Hager ‘o ia ‘o se tusitala, peita’i ‘o lo’o ia lē āmana’iaina vāega ‘autū ‘o faiga fa’atusitala talafeagai, ‘o le tu’u atu lea ‘o tu’ua’iga ogaoga ‘i tagata ‘o lo’o faitioina, ma ‘ave ‘i ai se avanoa talafeagai ‘e tali atu ai ‘i ia tu’ua’iga.

Na tā’ua ‘e Williams, ‘o le ‘ā vā’ili’ili lelei ‘e le Taxpayers’ Union le tusi ‘a Hager. 

Link to RNZ (Article): https://www.rnz.co.nz/news/politics/1523329/nicky-hager-s-new-book-dirty-work-expose-of-taxpayers-union

IMAGE/ATA: RNZ / Lillian Hanly