Fa’ailoa isi nofoaga na o’o ‘i ai ‘e tagata ‘ua maua ‘i le mīsela ‘i ‘Aukilani

‘O se faletalavai ma se supamāketi ‘i ‘Aukilani ‘ia nisi ‘o nofoaga na o’o ‘i ai le tagata lea ‘ua maua ‘i le mīsela ‘e pei ‘ona tā’ua ‘i la tātou tala ‘i le Aso Gafua.

‘O le Aso Sā lea na fa’alaua’itele mai ai ‘e le Te Whatu Ora le iai ‘o se tagata ‘ua maua ‘i le mīsela, ‘ātoa ai ma nofoaga faitele na o’o ‘i ai ‘o ia ‘i le ‘a’ai ‘o ‘Aukilani, ‘e aofia ai ma le tele ‘o taimi na malaga ai ‘i va’ālalo po’o ferries, ma se supamāketi ‘i ‘Aukilani ‘i Sisifo.

‘Ae ‘o le Aso Gafua ananafi lea na toe fa’ailoa ma ai ‘e le matāgāluega ‘a le sifua mālōlōina isi nofoaga sā asiasi ‘i ai le tagata lava lenei ‘ua maua ‘i le mīsela.

‘O ia nofoaga ‘e aofia ai le faletalavai, ‘o le Unichem Pharmacy ‘i New Lynn ‘i le aso 7 ‘o Mē mai le 9.00 ‘i ‘e o’o ‘i le ‘afa ‘o le 10.00 ‘i le taeao, ma le supamāketi ‘a le Pak and Save ‘i Mt Albert ‘i le aso 7 lava ‘o Mē ‘i le vā ‘o le 10.00 ‘i le taeao ma le kuata ‘i le 12.

‘O tagata ‘uma sā iai ‘i ia nofoaga ‘i taimi ma le aso ‘e pei ‘ona tā’ua, na tā’ua ‘e le matāgāluega ‘e tatau ‘ona siaki pē ‘ua faia ni olātou tui puipui ‘o le mīsela.

‘O lea ‘ua fa’amaonia mai anapō ‘e le kamupanī va’a ‘o le Fuller360, ‘o le tagata ‘ua a’afia ‘i  le mīsela, ‘o se tasi ‘e ‘auva’a ‘i se tasi ‘o ona va’a laupāsese ia ‘e femālāga’i ‘i le vā ‘o ‘Aukilani ma ona motu lāiti.

Link to 1News (Article) translated: https://www.rnz.co.nz/news/national/560725/auckland-measles-case-new-locations-of-interest-include-chemist-second-supermarket

ATA: RNZ /Dom Thomas