Fa’afītāuli tonu na tūai ai femalāgā’iga ‘i le malae va’alele ‘i ‘Aukilani

Na fa’ailoa ‘e le malae va’alele ‘a ‘Aukilani ‘i le aso ananafi, le māfua’aga na ala ai ‘ona pē la lātou ‘au’aunaga ‘e siaki ai pepa malaga mō pasese ‘e malaga ‘i fafo atu ‘o Niu Sila, ma na māfua, ‘ona ‘o se fa’afītāuli ‘i le ki ‘e maua ai feso’ota’iga.  ‘E 18 malaga ‘i atunu’u ‘i fafo na fa’atuai, ‘ae na matuā ‘u’umi laina āga’i ‘i masini ma le itū ‘e siaki ai pepa malaga.  Na tā’ua ‘e Chloe Surridge ‘o le malae va’alele ‘i le Leitiō Niu Sila, na leaga le ki ‘e tatala ai feso’ota’iga ‘i le itū ‘e iai ‘au’aunaga ‘o feso’ota’iga televavave ‘a le malae va’alele.  Na motusia ai feso’ota’iga ma pisinisi, ‘e aofia ai feso’ota’iga ma se tasi ‘o ‘au’aunaga fa’avāomālō mō le tēkonolosi ‘e fa’aaogā ‘e kamupani va’alele, lea ‘e fa’alagolago ‘i ai le polokalame ‘e siaki ai pepa malaga. 

‘O nai vāiaso ‘ua tuana’i atu, na leaga ai fo’i ni polokalame se 23 ‘e fa’agaioi ai le la’uga ‘o ‘ato ‘i le malae va’alele.  Na ta’ua e Surridge, ‘o lo’o fau sa lātou polokalame fou mō le fela’ua’iga ‘o ‘ato ma ‘e tatau ‘ona fa’aleleia le polokalame tuai lea ‘ua 30 tausaga le matua, ‘ina ‘ia mafai ai fo’i ‘ona faia le polokalame fou. 

Link to RNZ (Article) translated by Savelina Kasiano: https://www.rnz.co.nz/news/national/536372/auckland-airport-reveals-problem-that-led-to-major-delays

ATA: RNZ / Marika Khabazi