Fa’afetaia le ‘au tineimū mai Niu Sila

‘Ua fa’afetaia ‘e le palemia ‘o le mālō ‘o Kānata, ‘o Justin Trudeau ‘ia le ‘au tineimū mai Niu Sila, ‘i la lātou fesoasoani ‘i le tau tapēina ‘o se mū tele ‘o le togāvao na a’afia ai le ‘ele’ele fa’asaoina, ‘o le Jasper National Park.

 ‘O se tusitusiga āloa’ia ‘a le ali’i Palemia ‘o Trudeau ‘i luga ‘o le ‘auala ‘o feso’ota’iga ‘o le X, lea sā igoa muamua ‘o le Twitter, na ia fa’afetaia ai le fesoasoani ‘a fuimū ‘a Niu Sila, fa’apea ‘Ausetālia, Mexico ma Aferika ‘i Saute, ‘i lo lātou sao ‘i le tau tineia ‘o lenei mū ‘i Kānata.

‘O le taimi nei, ‘o lea ‘ua masuiga mālie lenei afi, ‘ona ‘ua pa’ū le timu ma ‘ua iai se suiga ‘i uiga ‘o le tau ‘i lea vāega ‘o le atunu’u, ‘ua tau mālū, peita’i, ‘o lo’o tūmau pea ‘ona iai lapata’iga ‘i le ono lamatia ‘o le saogalēmū ‘o tagata, ma ‘ua fa’atūmauina ai ‘ona fa’asā ‘ona toe fo’i atu tagata sā ‘ave’esea mai o lātou fale ‘i le taimi ‘o le mālosi ‘o lenei afi.

Na fa’ailoa mai ‘e le ali’i ‘o Scott Marchant ‘o le vāega ‘o le ‘au tineimū mai Niu Sila, sā ‘ave la lātou fa’amuamua ‘i le puipuia ‘o meatōtino ma le fa’asaoina ‘o le soifua ‘o tagata.

Na ia tā’ua ‘e tele taimi ‘ua fesoasoani ai le ‘au tineimū ‘a Niu Sila ‘i mū ma afi ‘o le togāvao ‘e tūla’i mai ‘i totonu ‘o ‘Ausetālia, fa’apea ai ma Kānata.

‘O le mū lenei ‘i Kānata ‘ua fa’atama’ia ai le tasi vae tolu ‘o le ‘a’ai ‘o Jasper lea ‘e fiafia tūrisi ‘e malaga ‘i ai, ‘o se nu’u ‘i totonu ‘o le ‘ele’ele fa’asaoina.

ATA: Handout / Jasper National Park / AFP (through RNZ.