Fa’aeaina Dr. Aliitasi Su’a Tavila ‘i Tufagā Fa’ailoga ‘a le Iunivesitē ‘o Vītōria Uēligitone

‘O le vāiaso talu ai na faia ai se tufagā fa’ailoga ‘a le Te Herenga Waka, le Iunivesitē ‘o Vītōria ‘i Uēligitone ‘o le Ki te Pae Excellence Awards ‘e fa’atāuaina ai faiā’oga ‘i le Iunivesitē ‘ātoa ‘ua maoa’e la lātou tautua ma ‘ua molimauina le lelei ‘āto’atoa ‘o le fa’atinoga ‘o a lātou matāfai’oi mā lo lātou sao telē ‘ua mafai ai ‘ona ‘ausia le tōfāmamao ‘a le iunivesitē. 

Na fa’amanuiaina ai le Susuga ‘a Dr. Ali’itasi Su’a Tāvila ‘i le fa’ailoga ‘o le Le Moana Mua Award.  ‘O Dr Aliitasi, ‘o le Faiā’oga Sīnia ‘i le School of health ‘i le Iunivesitē ‘o Vītōria.  ‘Ua molimau le iunivesitē, ‘o le a’oa’oga ‘a Dr Aliitasi, ‘ua atagia mai ai mata’aga matagōfie fa’a-Pasefika ‘ua tā aofa’i ‘uma ai vāega tāua ‘uma.  Ma na te a’oa’o atu ‘i se ‘auala ‘e lē gata ‘e fa’aaloalogia ai le silafia tāua na pasi mai ‘e tua’ā ma ia fa’amautinoa fo’i ‘o lo’o fa’a’āuai tagata ‘uma ma mafai ‘ona o lātou a’oa’o tusa lava po’o ai ‘i lātou.  ‘Ae ‘o lo’o puipui ma tausisi pea ‘i mata’aga matagofie ‘o tū ma aga’ifanua fa’apea o lātou fa’asinomaga, ‘e fa’avae nei mea ‘uma ‘i le Tōfā Mamao. 

‘O le susuga ‘a Dr Ali’itasi ‘o se sui ‘o le Komiti Fa’atonu ‘a le Leitiō ‘o le Si’ufofoga ‘o le Laumua.  Sā molimauina fo’i nisi ‘o tama fānau ‘a Sāmoa na fa’amanuiaina ‘i nisi fo’i ‘o fa’ailoga.

ATA: Pasifika at Te Herenga Waka – Victoria University of Wellington / Facebook.