Fa’aauau ‘ona tē’ena ‘e tagata ‘o Woodville le totogi ‘o le ‘auala fou ‘ua sui ai le Manawatu Gorge

‘Ua tāpuni ma fa’amuta le avanoa ‘e fa’aalia ai manatu ma lagona ‘o tagata, ‘i le fuafuaga ‘e totogi le fa’aaogāina ‘o le ‘auala fou lea ‘ua sui ai le ‘auala ‘o le Manawatu Gorge ‘i aso ‘ua mavae.  Peita’i, ‘e le’o muta ai le taumafai pea ‘o tagata ‘o le pitonu’u ‘o Woodville, ‘e fa’aaalia lo lātou tete’e nai le faia ‘o se totōgi ‘e uia ai ‘e ta’avale le ‘auala fou lea ‘ua lata nei ‘ina māe’a.

‘O le fuafuaga ‘e pei ‘ona fa’ailoa mai, ‘o tagata ‘uma ‘e malaga ‘iā lātou ta’avale lāiti po’o light vehicles ‘i le vā ‘o Palmerston North ma Woodville ‘e $4.30 ‘i le na’o le alu, po’o lona uiga ‘e $8.60 sene ‘i le alu ma le sau ‘i lea vā, ‘ae ‘o ta’avale mamafa po’o heavy vehicles, ‘e ono o’o ‘i le $17.20 sene le tau ‘e totogi ‘e ‘i lātou.  ‘E pei ‘ona silafia, ‘o le ‘auala tuai lea sā iai ‘o le State Highway 3, sā ui atu ‘i ‘autafa ‘o le vaitafe ‘i le Manawatu Gorge, na tāpunia ‘i le tausaga ‘e 2017, ‘ona ‘o se solo tele na poloka ma punitia ai.

‘Ua fa’ailoa mai fo’’i e fa’apea, ‘o le ‘auala fou ‘ua fausia nei ‘e sui ai lea auala, ‘e tatau ‘ona o’o ‘i le tausaga ‘e 2025 ‘ua o’o ‘i le 10,902 le aofa’iga ‘o ta’avale ‘e fa’aaogāina ‘i le aso, mā ‘e aulia atu le tausaga ‘e 2048 ‘ua o’o lea aofa’iga ‘i le 14,250 ta’avale ‘i le aso, tusa ma le 10,000 ‘ua maualuga ai nai lō le  aofa’iga ‘e mana’omia ai le faia ‘o se tau po’o se totogi ‘o lea ‘auala, ‘e tusa ai ‘o aiāiga māsani ‘a le Pūlega ‘o ‘Auala Tetele ‘o Niu Sila.

‘O le tau ‘o le ‘auala fou ‘e 11.5 kilomita le umi, lea ‘ua fausia ‘i luga ‘o le atumauga ‘o le Ruahine Range, sā mua’i fa’atūlagaina ‘i le $620-miliona Tālā, ‘ae ‘o lea ‘ua o’o atu ‘i le $824.1-Miliona Tālā, lea ‘ua māfua ai ‘ona mana’omia le faia ‘o se tau po’o se toll ‘e fa’aaogāina ai.

Na fa’ailoa mai ‘e se sui ‘o le mafutaga ‘o tagata ‘o le nu’u’ o Woodville, ‘o Vickie Tomlinson, ‘o le ‘ā fa’aauau pea ‘ona o lātou fīnauina lenei matā’upu ma tete’e ‘i le faia ‘o se tau ‘e fa’aaogā ai le ‘auala.  Na ia tā’ua ‘e lēai ma se tagata ‘o lo lātou pitonu’u ‘e mana’o ‘e faia se totogi ‘o lenei ‘auala ‘ona ‘e lē ‘o se mea talafeagai.

Na tā’ua fo’i ‘e lenei māfine, ‘o le faigāmālō lea ‘e tū nei ‘i le foe, ‘e nā’o le tupe lava ‘e mana’o ‘i ai, mā ‘o le mat’ā’upu lenei ‘o se fuafuaga ‘ua matuā iloga ‘ona mafatia ai tagata ‘o Woodville, ma se vāega tele ‘o itūmālō ‘i lea vāega ‘o le motu ‘i mātū.  Sā ia tā’ua fo’i, ‘e lagolagoina mālosi le lātou mau, ‘e pūlega ‘uma fa’alōtoifale ‘i le itūlagi ‘i saute ‘o le motu ‘i mātū, ‘ona ‘o a’afiaga ‘o tagata ‘i le lumana’i.

Link to RNZ (Article) translated by Lauano Ilaoa: https://www.rnz.co.nz/news/national/530695/no-one-wants-this-locals-vow-to-keep-fighting-tolls-on-new-manawatu-gorge-road

ATA: RNZ