Fa’aauau ‘ona a‘afia malaga ‘a va’āalalo ‘i le vāinu’u ‘ona ‘o uiga loulouā ‘o le tau ‘o lo’o iai

‘O le ‘ā fa’aauau pea ‘i le asō, ‘ona iai fa’alētonu mō tagata malaga ‘i va’āalalo ‘i le vāinu’u, le vā lea ‘o le Motu ‘i Mātū ma le Motu ‘i Saute, ‘ona ‘o tūlaga loulouā ma le fa’alētonu ‘o le tau, ‘e pei ‘ona āfāina ai nisi malaga fa’atūlagaina ‘a va’a ‘i le fa’ai’uga ‘o le vāiaso.

‘O le mālolosi ‘o matagi ma le maualuluga ‘o galu na tāofia ai ‘e le’i fa’ataunu’uina malaga ‘i le vā ‘o Picton ma Uēligitone ‘i le Aso Sā ananafi, ‘ae lua isi malaga na tuai ‘ona faia ‘i le pō ‘o le Aso Sā, ‘ona ‘o ia lava tūlaga fa’alētonu. 

‘O se tasi ‘o ia malaga, ‘o le malaga ‘a le va’a ‘o le KAITAKI, lea sā fa’atūlaga ‘e tu’ua Uēligitone ‘i le 8.30 ‘i le pō anapō ma le pāsese ‘e tusa ma le 800, lea na fa’ato’ā mafai ‘ona alu ’ese ma le laumua ‘i le ītūlā ‘e 1.00 ‘i le vaveao analeilā.  ‘E lē gata ‘i lea ‘ae sā fa’apea fo’i ‘ona āfāina le malaga ‘a le va’a ‘o le KAIARAHI mai Picton ‘i Uēligitone ma le pāsese ‘e 500, lea na fa’ato’ā alu ‘ese mai ma Picton ‘i le vaeluaga ‘o le pō ‘o le Aso Sā. 

‘O malaga fa’atūlagaina ‘e lua ‘a le va’a ‘o le ARATERE sā fuafua mō le 6.15 ‘i le taeao fa’apea ma le 11.00 ‘i le taeao analeilā, ‘ua lē fa’ataunu’uina.  ‘Ae na tā’ua, ‘o le ‘ā fa’ataunu’uina lava malaga fa’atūlagaina ‘i le asō ‘a si va’a ‘o le KAITAKI ma le KAIARAHI.  ‘E fā fo’i malaga fa’atūlagaina ‘a va’a ‘o le Bluebridge na tāofia ‘e le’i mafai ‘ona fa’ataunu’uina ‘i le Aso Sā ma isi malaga ‘e lima ‘i le asō ‘a lea lava kamupanī, ‘ua tāofia ‘ona ‘o tūlaga fa’alētonu lava ‘o le tau ‘i le vāinu’u.

Na fa’ailoa mai ‘e pūlega ‘o kamupanī va’a, ‘o le ‘ā tūmau pea ‘ona iai ia fa’alētonu ‘i lenei aso ‘ātoa, mā ‘o lo’o talosia ‘e o’o atu ‘i le afiafi nānei ‘ua maua se suiga.

Link to RNZ (Article) translated by Lauano Ilaoa: https://www.rnz.co.nz/news/national/538221/cook-strait-ferry-passengers-face-more-disruption-as-stormy-weather-continues

ATA: RNZ / Richard Tindiller