Fa’aaogā ‘e le Minisitā mālosi’aga fa’apitoa ‘e fa’atino ai ‘e fitafita gāluega māsani ‘a’o tete’e le NZDF

Na fa’aaogāina ‘e le Minisitā ‘o le Puipuiga Judith Collins ona mālosi’aga fa’apitoa ‘e fa’ataga ai fitafita ‘e fa’atino gāluega ‘a tagata faigāluega ‘a le Matāgāluega ‘o le Mālosi’aga Fa’afitafita sa faia la lātou solo tete’e ‘e fa’asaga ‘i o lātou totogi.  ‘E tusa ma le to’a 1000 le ‘aufaigāluega na faia la lātou tete’e ‘i le vāiaso talu ai, ma sā musu le Fa’alāpotopotoga po’o le Matāgāluega ‘e ofo atu se si’itaga ‘o totogi. 

‘I lalo ‘o le Tūlāfono, le Defence Act, fa’ato’ā fa’aaogā lava fitafita ‘i ni taimi ‘o ni fe’ese’eseā’iga ‘i le vā ‘o tagata faigāluega ma le pūlega, pe ‘ā fai ‘e faia se fa’atonuga tusitusia ‘a le minisitā, ma sā fa’amaonia ‘e Collins na ia fa’aaogāina le tūlāfono.  ‘O le manatu fa’aalia ‘o Fleur Fitzsimons, le failautusi lagolago ‘a le PSA, ‘o le fa’aaogāga ‘e le minisitā ‘o le tūlāfono lea na gata ‘ona toe fa’aaogā mai le 2001, ‘o se taumafaiga ‘e ta’ufa’atauva’aina ai le tete’e ‘a le ‘aufaigāluega.  Peita’i, ‘o le fa’aaogā ‘o fitafita ‘e sui ‘i le ‘aufaigāluega, ‘ua manino ai, ‘e lē mafai ‘ona gāioi le militeli ‘e aunoa ma le ‘aufaigāluega.  Sā tāpā vave ‘e le PSA se fautuaga mai le tūlāfono pe sā mulimulita’ia ‘e Collins le tūlāfono ‘i lana gāioiga na fa’atino. 

Link to RNZ (Article) translated by Savelina Kasiano: https://www.rnz.co.nz/news/national/533567/defence-minister-uses-extraordinary-power-to-allow-soldiers-to-do-civillian-work-during-nzdf-strike

ATA: RNZ / Samuel Rillstone.