Fa’aaogā ‘aufaigāluega ‘i puipuiga ‘o tuā’oi ‘e fa’a’auala mai ai fuālā’au fa’asāina ‘i Niu Sila

‘Ua fa’aalia ‘e le ‘Ōfisa ‘o Tiute, ‘ua fa’aopoopoina lava ‘e fa’alāpotopotoga ‘e faia taupulepulega ‘i faiga fa’asolitūlāfono le fa’aaogā ‘o tagata ‘e faigāluega ‘i ‘au’aunaga ‘e puipuia tuā’oi ‘o le atunu’u, ‘e fa’a’auala mai ai uta ‘o fuālā’au fa’asāina ‘i totonu ‘o le atunu’u. 

‘O le vāiaso talu ai, na lokaina ai ni taulele’a se to’atolu, ‘e iai o lātou pi’itaga ‘i se vāega ‘i Mexico ‘e faia taupulepulega fa’asolitūlāfono, ‘ona ‘o lo lātou ‘āuai ‘i le ‘aumaiga ‘o ni fuālā’au fa’asāina ‘e lata ‘i le 180 kilokalama le mamafa ‘o le methamphetamine.  ‘Ua tā’ua, ‘o tagata ‘e le’i solitūlāfono pe le’i ‘ele’elea muamua ‘o lātou igoa ‘i ni āmioga fa’asolitūlāfono ‘e tusa ai ma fa’amaumauga, ‘o lo’o fa’atūtū ‘i ai gāioiga ‘a ia fa’alāpotopotoga ‘ona ‘o lo’o mafai ‘ona lātou tatala ni vāega ‘e fa’asāina ma fa’atapula’aina mai tagata lautele.  Na fa’aalia ‘e se tasi ‘o le pūlēga ‘o le ‘Ōfisa ‘o Tiute, Bruce Berry, ‘e la’itiiti lava le fa’amaoniga, ‘o lo’o iai nisi ‘i luga atu ‘o lo’o faia ni gāioiga pi’opi’o.  ‘I se līpoti fou na faia ma fa’alauiloa fa’alaua’itele ‘ona ‘o le Tūlāfono ‘o Fa’amaumauga Āloa’ia, na fa’aalia ai, ‘ua fa’aopoopoina lava le iai ‘o tagata ‘i totonu ‘o lo’o mafai ‘ona maua ai avanoa ma ofi atu ai ia gāioiga, ‘a’o fa’atuputupula’ia ai kegi ‘o lo’o taupulepule fa’atasi le faiga ‘o gāioiga fa’asolitūlāfono.

Link to RNZ (Article) translated by Savelina Kasiano: https://www.rnz.co.nz/news/national/525017/criminals-using-border-workers-to-get-drugs-into-nz-well-on-the-rise

ATA: Supplied (NZ Police) / RNZ.