Fa’aagaga le 111 mō na’o gasegase tigāina

‘Ua fautuaina le atunu’u ‘e ta’avale ‘a le falema’i ‘o le ‘au’aunaga ‘a le St John, ‘ina ‘ia fa’aagaga le 111 mō na’o vala’au ‘o fa’alavelave fa’afuase’i ma ‘ua ‘i ni tūlaga ogaoga a’afiaga ‘o ni soifua.  Na tā’ua ‘e le St John le pisi tele ‘o la lātou ‘au’aunaga ‘i le pō. 

‘E tusa ma le to’a 2500 tagata faigāluega ‘i ta’avale ‘a falema’i le St John Ambulance ‘o lo’o fa’agāsolo a lātou tete’e mō itūlā muamua ‘e fā ‘o le ‘āmataga ‘o a lātou sifi.  Na ‘āmata le tete’e ‘i le 4 ‘i le vaveao mō itūlā ‘e 24.  ‘O le isi tete’e sa fa’atūlagaina mai le itūlā ‘e 4 ‘i le vaveao ‘o le Aso To’ona’i.  Sa feūtaga’i le St John ma iuni ‘a tagata faigāluega ‘e fa’atatau ‘i o lātou totogi ma tūlaga ‘iā lātou gāluega ‘ina ‘ua māe’a le aogā po’o le taimi fa’atūlagaina ‘o la lātou māliliega tu’ufa’atasi ‘i le fa’ai’uga ‘o le tausaga talu ai.  ‘O lo’o fa’amanatu ‘e le sui ‘ōfisa sili mō ‘au’aunaga ‘a le ta’avale mō gasegase fa’afuase’i, ‘e mafai lava ‘e le atunu’u ‘ona vala’au le 111 ‘i taimi ‘o tete’e ‘a le ‘aufaigāluega ma maua le fesoasoani ‘aemaise ‘o gasegase ogaoga ma tūlaga fa’alētonu ‘ae mō gasegase ‘e lē mo’omiaina vave se togafitiga, ‘ina ‘ia vala’au ‘i le Healthline pe o’o atu fo’i ‘i le falema’i po’o nisi ‘au’aunaga ‘o le soifua mālōlōina ‘e alagā tatau ‘ona vave ‘ave ‘i ai.

Link to RNZ (Article) translated by Savelina Kasiano: https://www.rnz.co.nz/news/national/525710/people-asked-to-reserve-111-ambulance-calls-for-life-threatening-emergencies

ATA: St John NZ (RNZ).