Fā fuafuaga ‘a le mālō ‘e ono lē mafai ‘ona fa’ataunu’u
‘E fā ni Fuafuaga Fa’ata’atitia, mai le aofa’iga ‘e iva ‘o Fuafuaga ‘Autū, po’o key target ‘a le Faigāmālō, ‘e ono lē mafai ‘ona fa’ataunu’u.
‘Ua iloa lea tūlaga ‘i se līpoti lata mai nei, ‘e pei ‘ona fa’ailoa ‘i se fa’asalalauga ‘a le Uaeālesi Fa’asalalau ‘a Niu Sila, le Radio New Zealand.
Na tā’ua ‘i lea līpoti, ‘ua si’itia maualuga ‘i le 216,000 afe le aofa’iga ‘o tagata ‘ua iai nei ‘i le lisi ‘o ē ‘o lo’o maua le penefiti su’e gāluega, le Job Seeker Benefit, ‘ae ‘o fuainūmera sā fuafua ‘e tatau ‘ona ‘ausia mō matā’upu tau a’oa’oga, ‘e le’i taitai iai ni fōliga ‘e mafai ‘ona ‘ausia.
‘O le fuainūmera sā fuafua ‘e fa’apa’ū ‘i ai le aofa’iga ‘o tagata ‘e nonofo ‘i fale lē tūmau ‘o le Mālō, po’o emergency housing, ‘ua mafai ‘ona ‘ausia ‘i le taimi nei.
‘O fuafuaga fa’ata’atitia ‘autū nei ‘e iva ‘a le faigāmālō so’ofa’atasi sā fuafua ‘e tatau ‘ona o’o atu ‘i le tausaga ‘e 2030 ‘ua mafai ‘ona ‘ausia ma fa’ataunu’uina.
Peita’i lā, ‘ua manino mai ‘e lē mafai ‘ona fa’atino nisi ‘o ia fuafuaga.
‘O se fa’ata’ita’iga, ‘o le fa’amoemoe ‘ina ‘ia o’o ‘i le 95 pasene le aofa’iga ‘o ma’i ‘e o’o atu ‘i vāega mō fa’alavelave fa’afuase’i po’o emergencies, ‘e tatau ‘ona va’aia ma ‘ave ‘i se ward ‘i totonu ‘o le ono ītūlā, ‘e lēai ni fōliga ‘e mafai ‘ona fa’atino.
‘O le vāega fo’i ‘o a’oa’oga, ‘e nā ‘o le 65 pasene ‘ua mafai ‘ona ‘ausia ‘o le aofa’iga ‘e 80 sā fa’atūlaga ‘e tatau ‘ona o’o ‘i ai le aofa’iga ‘o tamaiti ‘e ō atu ‘i le ā’oga ‘i le kuata muamua ‘o lenei tausaga, ‘o le fa’amoemoe ‘o le malo, ‘ina ‘ia ‘aua ne’i sili atu ‘i le lima aso ‘e lē ā’oga ai se tamaitiiti ‘i totonu ‘o se kuata ā’oga po’o se term.
‘A’o le fuafuaga ‘e fa’aitīitia ai le aofa’iga ‘o ‘āiga ‘e nonofo ‘i fale lē tūmau ‘o le mālō, (emergency housing), ‘ua matuā maoa’e le vave ‘ona ‘ausia.
Mai le aofa’iga ‘e 3141 ‘o ‘āiga sā fa’aaofaina lea polokalame, sā fa’atūlaga ai ‘e le mālō le fuafuaga ‘e fa’aitīitia le 75 pasene ma fa’apa’ū ifo lea aofa’iga ‘i le nā ‘o le 800.
‘O le taimi nei, ‘o lea ‘ua nā ‘o le 501 le aofa’iga ‘o ‘āiga ‘o lo’o iai pea ‘i lea polokalame, ‘o se aofa’iga ‘ua matuā maualalo atu nai lō le aofa’iga ‘e 800 lea sā mua’i fuafuaina ‘e tatau ‘ona aulia le tausaga ‘e 2030 ‘ua maua.
Link to RNZ (Article) translated: https://www.rnz.co.nz/news/national/572372/missing-targets-govt-risks-falling-behind-in-four-key-areas
ATA: Screenshot (RNZ).