‘E ‘umi le taimi ‘e fa’amamā ai lafu moa – saunoa ai se fai lafu manu ‘Ausetālia  na a’afia ‘i le bird flu

Na fa’aalia ‘i le Checkpoint ‘a le Leitiō Niu Sila, ‘o le lapata’iga ‘a se fai lafu manu ‘Ausetālia na a’afia ‘i le fa’ama’i ‘o le Bird Flu ‘i le au fai lafu manu Niu Sila, ‘e faitau māsina ‘e toe fa’aleleia ma mafai ‘ona toe fa’afo’i ai moa ‘i fa’ato’aga ma fa’afofoa.  ‘Ua fa’amaonia le a’afia ‘o se lafu moa ‘i Otago ‘e pūleaina ‘e le Mainland Poultry, ‘i se siama ‘e matuā pipisi lava ma ogaoga ‘o le H7N6.  ‘O le taimi muamua lea ‘ua maua ai lea vāega ‘o le avian influenza ‘i totonu ‘o Niu Sila mā ‘e ono fōliga mai na pipisi mai manu ‘e pei ‘o swans po’o pato ma fanafanau mai ai lava.  ‘E lēai se so’otaga ‘i fa’ama’i na pepesi talu ai nei ‘i ‘Ausetālia. 

‘O le asō lea ‘ua ‘āmata fafasi mate ai moa ‘e 80,000 ‘i se lafu manu ‘i Otago.  ‘I ‘Ausetālia, ‘e silia ma le lua miliona le aofa’iga ‘o moa na fafasi mate mai le silia ma le 12 ‘o ni lafu manu talu ‘ona pepesi le avian flu ‘i le māsina ‘o Mē ‘i lenei tausaga.  Na tā’ua ‘e Bradley McAuliffe ‘o se fai lafu moa ‘e fa’afofoa mai ai fuāmoa ‘i ‘Ausetālia, ‘e lua ni ana lafu manu na a’afia mai le bird flu ma na fa’amālosia ‘ona tapē le faitau selau afe ‘o moa mai ana lafu.  Sā ia tā’ua ‘i le Checkpoint, ‘e 6 māsina talu mai fa’amaoniga muamua ‘o le fa’ama’i ‘i ana lafu manu, ‘ae ‘o lea fa’ato’ā toe ‘āmata ‘ona toe sui atu moa ‘i ana lafu ia na a’afia.

Link to RNZ (Article) translated by Savelina Kasiano: https://www.rnz.co.nz/news/national/535579/it-was-a-long-process-getting-the-farms-clean-australian-farmer-hit-by-bird-flu

ATA: Morgane Perraud / Unsplash. (RNZ).