‘E tatau ‘ona maua muamua ‘āiga ‘a’o le’i tali ‘i le fa’afītāuli ‘o tamaiti tia’i ā’oga

Na fa’aalia ‘e se tagata ‘e tulituliloaina tamaiti lē ā’o’oga ‘i ‘Aukilani, ‘e māsani lava ‘ona tuai tele le fa’atinoga ‘o ni fuafuaga ‘i tamaiti ‘e lē ō ‘i le ā’oga mā ‘e to’atele tele tamaiti ‘e lē maua ‘ona ‘e iai taimi ‘e lē maua ai fa’amaumauga ‘o o lātou ‘āiga ‘i le lisi po’o le system.  Sa lipotia ‘e le ‘Ōfisa ‘o le Education Review Office ‘i le Aso Lulu, ‘e 80,000 le aofa’iga ‘o tamaiti ‘ua fai ma māsani le lē ō ‘i le ā’oga ‘i le kuata lua ‘o lenei tausaga, ma ‘o se taimi pito sili atu ‘ona leaga pe ‘ā fua ‘i kuata ‘e fā ‘o le ā’oga ‘i le tausaga. 

‘E tusa ‘e to’atasi ‘i le to’asefulu tamaiti ‘e silia ma le 30 pasene le taimi ‘o le vasega na lē ‘āuai ai ‘i lea kuata ma na fa’aluaina le fuainūmera sā fa’amauina ‘i le 10 tausaga ‘ua tuana’i pei ‘ona tā’ua ‘i le līpoti.  ‘E mafai ‘ona maua ‘e ‘au’aunaga ‘e tulituliloaina le tia’i ā’oga ‘o tamaiti, le avanoa ‘e va’ava’ai ai ‘i fa’amaumauga ‘a le Matāgāluega ‘o Ā’oga, ‘ina ‘ia siaki po’o le mea ‘ua sifi tamaiti ma ā’o’oga ai ‘i nisi ā’oga, peita’i, ‘e lē fa’apea ‘e sa’o lava ‘i taimi uma. ‘O nisi taimi, ‘e lē sa’o ai tuātusi.  ‘E iai nisi tamaiti, ‘e ono o’o i le ta’i 11, 12 pe 13 aso ā’oga ‘o le kuata ‘e lē ō ai, ma ‘e le’o ‘ausia ai le 90 pasene ‘e tatau ‘ona iai le nūmera ‘o tamaiti ‘e ‘āuai ‘i le ā’oga.

Link to RNZ (article) translated by Savelina Kasiano: https://www.rnz.co.nz/news/national/532354/families-have-to-be-found-before-truancy-tackled-says-school-attendance-officer

Ata: By the time attendance services meet families, they’ve often been absent from school for years, an officer says. Photo: 123rf