‘E solomuli ‘ae lē alu ‘i luma ‘ona ‘o suiga ‘i le Te Arawhiti; fai mai ai le Labour

‘E lē āga’i ‘i luma ‘ae na’o le alu solomuli, le fuafuaga ‘a le mālō ‘e toe fa’aitīitia ai matāfaioi mō le Te Arawhiti, le ‘Ōfisa mō matā’upu ‘i le vā ‘o Māori ma le Mālō pei ‘ona saunoa le ta’ita’i ‘o le Labour. 

Na fa’asilasila ‘e le Minisitā Tama Potaka ‘i le Aso Lua, sa fa’amanino ‘e le faigāmālō matāfaioi po’o gāluega ‘a le Te Arawhiti ma le Te Puni Kokiri, le Matāgāluega mō le Ātina’ega ‘o Māori.  Na saunoa Potaka ‘o le ‘ā tūmau pea le Te Arawhiti ‘o se lālā fa’alematāgāluega ma fa’aauau ana matāfaioi ‘autū ‘o le fa’agāioiga ‘o ni māliliega tu’ua ‘i lalo ‘o le Feagaiga ‘i Waitangi ma talosaga ‘i le Takutai Moana.  ‘O le ‘ā fa’aauau ‘e le Te Puni Kokiri isi matāfaioi ‘e pei ‘o le va’ava’aiga ma le faiga ‘o līpoti ‘i le fa’ataunu’uga ‘e le Mālō ‘o māliliega ‘i lalo ‘o le Feagaiga po’o le Treaty fa’atasi ai ma nisi so’otaga ‘i le māe’a ai ‘o le fa’atinoga ‘o ni māliliega tetele.  Na saunoa le ta’ita’i, Chris Hipkins, na fa’atūina le Te Arawhiti, ‘ona ‘o tiute fa’aauau ‘a le mālō ‘e fa’atūmau ai pea le so’otaga fa’aauau ma iwi ‘i taimi ‘e māe’a ai ‘ona soālaupule ma fa’ataunu’u ni māliliega.  Sā mafai ‘e le Te Arawhiti ‘ona fautua ‘i ni faigā fa’ai’uga ‘o iai ‘i le mālō ma va’ava’ai fo’i pē fa’apēfea ‘ona fa’aaogā ni lēsona na a’oa’oina mai le fa’agāsologa ‘o ni māliliega na faia, ‘i faigā fa’ai’uga ‘o le taimi nei, ‘ina ‘ia ‘aua ne’i toe faia ni mea sesē sā faia muamua.  ‘E atagia mai le faia ‘e le faigāmālō ‘o le taimi nei, ‘o ni mea sesē na tutupu muamua pei ona fa’aalia ‘e Chris Hipkins.

Link to RNZ (Article) translated by Savelina Kasiano: https://www.rnz.co.nz/news/political/525107/te-arawhiti-changes-a-step-backwards-labour-says

ATA: Labour leader Chris Hipkins. (RNZ) / Samuel Rillstone.