‘E o’o atu ‘i le 2000 tagata ‘e ono lē toe maua gāluega ‘i suiga ‘i taumafa ‘a tamaiti ‘i ā’oga

‘E o’o atu i le 2000 le aofa’iga ‘o tagata ‘e ono lē toe iai ni gāluega ‘ona ‘o le fa’ai’uga ‘a le mālō ‘e sui ai le fa’atupega ‘o taumafa ‘a tamaiti ‘i ā’oga.  ‘O le taimi nei, ‘e o’o atu i le 156 fa’alāpotopotoga ma kamupanī ‘e maua atu ai mea’ai a tamaiti, ‘i lalo ‘o le polokalame ‘o le Ka Ora, Ka Ako ‘o se polokalame mō  ni taumafataga ‘e maua ai le soifua mālōlōina.  Na fa’aalia ‘e le Matāgāluega ‘o Ā’oga, ‘o le Aso 24 Tēsema, ‘e fa’amuta ai konekarate ‘e 75 ‘a isi fa’alāpotopotoga po’o providers, ‘ina ‘ua faia se fa’ai’uga ‘e faipā’aga ai ma le School Lunch Collective, ‘e fa’agāluea’ina ‘e le kamupanī ‘a le Compass Group. 

‘E to’a 47 tagata sā fa’afaigāluega ‘e fa’atino le polokalame ‘o le ‘ā ‘ave’esea, ‘ona na fa’apogisāina ‘i lātou ‘i le fa’ai’uga ma le manatu sa toe fa’aopoopo le taimi ‘o a lātou konekarate ‘e oo atu ‘i le 2026.  Na saunoa le Minisitā lagolago mō Ā’oga David Seymour, ‘e lēai ni konekarate ‘ua o lātou ‘ave’esea, ‘ae ‘ua lātou filifili ‘e lē toe fa’aauauina nisi ‘o konekarate ‘o lo’o ‘ua iai. 

Sā fa’aalia ‘e le pule sili ‘o le Trust House, John Prendergast, ‘e lē popole po’o ai ‘e ‘ave ‘i ai le konekarate, ‘ae ‘o lo lātou popōlega, ‘o le lē mulimulita’ia lea ‘o le tāumauga na faia ‘e le minisitā ma le matāgāluega, ‘e fa’apea ‘o le fa’atupega ‘o mea’ai ‘a tamaiti mai le vasega tasi ‘e o’o i le vasega ono, ‘o le ‘ā fa’aauauina ‘e fa’alāpotopotoga (suppliers) ‘o lo’o iai ‘i le taimi nei, mō le isi lua tausaga.

Link to RNZ (article) translated by Savelina Kasiano: https://www.rnz.co.nz/news/national/532427/up-to-2000-people-could-lose-jobs-over-school-lunch-changes

Ata: RNZ / Samuel Rillstone – David Seymour tries out one of the new lunches.