‘E mo’omia le māta’itū lelei po’o ‘ova tupe ‘e totogi mō le penisini

‘E tatau ‘i le Komisi ‘e fa’amālosia le tulafono po’o talafeagai fefa’ataua’iga mō tagata fa’atau, ‘ona matuā su’esu’e lava po’o iai ni pamu penisini ‘o aofia ‘i gaioiga ‘o le so’ona tasi’i ‘o tau ‘o penisini ‘e tusa ai ma se fa’amatalaga ‘a le Consumer NZ.  ‘O le tele ‘o ‘aveta’avale ‘i le atunu’u, ia ‘ua fa’ailoa ni a lātou fa’amatalaga, ‘e taugatā tele atu le tau ‘o le penisini ‘o lo’o lātou totogiina nai lō piton’uu tuā’oi. 

‘E iai fo’i nisi ‘aveta’avale ‘e malaga ‘i fafo atu ‘o ō lātou pitonu’u po’o ‘a’ai, ‘e sa’ili pamu taugōfie ‘e utu ai ta’avale.  Na fa’aalia ‘e Jon Duffy ‘o le pule sili ‘o le Consumer NZ, ‘ā fai ‘o lo’o ta’atele ‘i totonu ‘o le atunu’u lenei fa’afītāuli, ‘ua tatau ‘ona ‘āmata ‘e le Commerce Commission se su’esu’ega. 

Na fa’aalia ‘e tagata ‘i Thames ‘i Coromandel, ‘ua tupu so’o le matuā tasi’i mauāluga ‘o tau ‘o penisini nai lō isi pitonu’u lata ane.  ‘E tolu pamu penisini ‘i Thames, mā ‘o tau mō ia pamu ‘uma, ‘e ‘i le vā ‘o le ta’i $2.91 ma le $2.96 mō le penisini 91 mā ‘e tusa ma le 20 ‘i le 30 sene ‘e taugatā atu ai nai lō nu’u lata ane ‘o Ngatea ma Tairua.   Na fa’aalia ‘e nisi ‘aveta’avale, ‘e ō ‘i isi pitonu’u ‘e sa’ili ai penisini taugōfie.

ATA: RNZ.